Балаҕан ыйын 27 күнэ, Саха сирин устуоруйатыгар ураты суолталаах күн. Бүгүн – Саха Өрөспүүбүлүкэтин судаарыстыбаннаһын күнэ!
Бүгүҥҥү бэлиэ күҥҥэ биһиги Өрөпүүбүлүкэбит судаарыстыбаннаһа олохтоноругар олук уурбут дьоммут – Максим Аммосов, Платон Ойуунускай, Степан Аржаков, Исидор Барахов уонна да атыттар ааттарын махталынан ааттыыбыт.
Биһиги Ньурба сирин дьоно-сэргэтэ, ыччаттар, кырачаан оҕолоро өрөспүүбүлүкэбит судаарыстыбаннаһа олохтоноругар, сайдарыгар турууласпыт биир дойдулаахтарбытынан – государственнай, общественнай – политичекай деятеллер Степан Васильевич Васильевынан, Михаил Васильевич Мегежекскайынан киэн туттабыт, кинилэр олоххо холобурдарын чиэстээхтик салгыырга дьулуһабыт.
Төрөөбүт Сахабыт сирэ саҥа олох суолугар үктэниитигэр олоҕун анаабыт большевик, коммунист, сатабыллаах салайааччы, биһиги биир дойдулаахпыт, биллиилээх государственнай, общественнай – политическай уонна профсоюзнай деятель Степан Васильевич Васильев бааматынньыгар ытыктабыл бэлиэни уурдулар “Ньурба оройуона” муниципальнай оройуон баһылыгын 1 солбуйааччыта Артур Янович Яковлев, Ньурба куорат муниципальнай тэриллии баһылыгын социальнай боппуруоска солбуйааччы Мария Константиновна Куличкина, Ньурба куорат 1 № — дээх орто оскуолатын учуутала Оксана Ивановна Петрова. Бу үөрүүлээх күнү ылбаҕай ырыаларынан киэргэттилэр Айыына Тыхеева, Светлана Васильева.
