«Я – ваш конферансье!» эр дьоҥҥо ыытааччылар аһаҕас күрэхтэрэ.

        Бу күннэргэ, муус устар 09 күнүгэр Н.И.Харитонов — Николай Чуор аатынан «Кыталык» КД үлэһиттэрэ аҕыйах киһилээх биригээдэнэн Мэҥэ-Хаҥалас улууһун Аллараа Бэстээҕэр баран республиканскай таһымнаах “Я-ваш конферансье!” эр дьоҥҥо ыытааччылар аһаҕас күрэхтэрин   ыытан кэллилэр.

        Билэргит курдук бу проект урут Бүлүү бөлөххө ыытыллар эбит буоллаҕына, быйылгы үһүс сылын илин эҥээргэ тэрийиэххэ, – диэн, бу күһүн проект автора Римма Сидорова этии киллэрбитигэр, бастаан утаа үлэһиттэр салла быһыытыйан баран, бэйэбит ыытар уоппуппутугар уонна хамаанданан үлэлиири сатыыр буолан, тутатына өйөөн, тэрээһини атын улууска тэрийэн ыытыыны боруобалаан, бэйэни тургутунан көрөн, бу проект киэн  кэскиллээҕин санаан,  тэрээһин өттүгэр күүскэ үлэлээбитинэн барбыппыт.

      Быйыл күрэххэ алта эр бэрдэ кытынна. Сайаапканы Ньурбаттан, Уус-Алдантан, Мэҥэ-Хаҥаластан, Амматтан тиийэ биэрдилэр. Аһаҕас күрэх хаамыыта хайдах буоларын барытын эрдэттэн бэлэмнээн  И.И.Попов – Алгыс салайааччылаах тэрийэр хамыыһыйа айаҥҥа турунна.

     Бэстээх кулуубун үлэһиттэрэ ыраахтан кэлбит дьону үөрэ-көтө көрсөн, сцена киэргэтиитигэр тиийэ көмөлөһөн, ирэ-хоро кэпсэтэн, уопут атастастылар. 

     Күрэх тойон сүбэтинэн үлэлээтилэр, Горнай улууһуттан — 2021 сыллаахха Ньурба оройуонугар ыытыллыбыт “Я-ваш конферансье!” аһаҕас күрэх Кылаан кыайыылааҕа — Күн Дьөһөгөй Үрдүк Өрөгөй, Мэҥэ-Хаҥаластан – Одун Элиэнэ, Өрөспүүбүлүкэттээҕи “Өбүгэ ситимэ” норуот эмчиттэрин түмсүүтүн салайааччыта, Саха сиринээҕи Итэҕэл түмсүүтүн кыттыылааҕа, Ньурбаттан – Саха Өрөспүүбүлүкэтин култууратын туйгуна, Ньурба улууһун Түмүк нэһилиэгин Бочуоттаах олохтооҕо, Москва куораттааҕы Сибиир уонна Уһук Илиҥҥи норуоттар култуураларын сайдыытын фондатын церемониймейстера, Өрөспүүбүлүкэттээҕи “Өбүгэ ситимэ” норуот эмчиттэрин түмсүүтүн кыттыылааҕа, Алгысчыт — Иван Попов-Алгыс, дьүүллүүр сүбэ бэрэссэдээтэлэ. Күрэх биэс түһүмэхтээх буолла, тойон сүбэ үс чааһы билбэккэ үлэлээн түмүгү таһаарыыта маннык буолла:  Гран  — При хаһаайына — Ньурбаттан Егор Михайлов, (бирииһэ «Егерь» маҕаһыыҥҥа 30000 сертификат),  бастакы миэстэни ылла Мэҥэ-Хаҥалас ыччата Николай Васильев,(бирииһэ – күрэх генеральнай спонсора «Металлторг» маҕаһыын (ИП ДО М.В.) туруорбут 25000 сууммалаах сертификата), иккис үрдэлгэ таҕыста Бэстээхтэн Лука Апросимов, (бирииһэ «Егерь» маҕаһыыҥҥа 15000 сууммалаах сертификат), үһүскэ Амматтан – Дмитрий Саввинов,(бирииһэ «Егерь» маҕаһыыҥҥа 10000 сууммалаах сертификат), Бороҕонтон Александр Гоголев “Ведущий развлекательных шоу-программ” анал ааты ылан «Егерь»маҕаһыыҥҥа 7000 сууммалаах сертификатынан уонна күрэх былырыыҥҥы Гран –При хаһаайына Күн Дьөһөгөй Үрдүк Өрөгөй туруорбут анал бирииһин ылла, «Ведущий конкурсно — игровых программ» номинация хаһаайына буолла, Мэҥэттэн Айаан Верховцев (бирииһэ «Егерь»маҕаһыыҥҥа 4250 сууммаҕа сертификат уонна «Өбүгэ ситимэ» эмчиттэр түмсүүлэрэ туруорбут анал бириистэрэ туттарылылынна).

     Быйылгы күрэх атын сиргэ ыытыллыбыт буолан, көрөөччүлэргэ сонун, тэрийээччилэргэ олус интириэһинэй, улахан уопуту биэрдэ. Илин эҥэр  улуустартан кыттыбыт биир идэлээхтэрбит, хайа баҕарар тэрээһини  атын, тэйиччи сытар улууска тиийэн ыытыахха сөбүн сөхтүлэр, инникитин бу уопуту үлэлэригэр киллэрэр соругу туруордулар. Тэрийэр бөлөх олохтоохтор биһирэбиллэрин ылан, киин улуус кулууба хайдах үлэлии-хамныы олорорун көрөн, уопут атастаһан, ирэ-хоро кэпсэтэн, соруктара туолан  үөрэн-көтөн сүргэлэрэ көтөҕүллэн кэлэн, саҥа былааннары туруорунан  үлэлии сылдьаллар.

Добавить комментарий

Ваш адрес email не будет опубликован.