Ньурбаҕа ийэ месячнига арылынна.

    Алтынньы 24 күнүгэр Н. И. Харитонов – Николай Чуор аатынан култуура дыбарыаһыгар өссө биир сэргэх тэрээһин буолан ааста. Быйылгы 2022 үбүлүөйдээх сылы Ил Дархаммыт А.С Николаев ийэлэр ураты оруоллаахтарын бэлиэтээн Ийэ сылынан биллэрбитэ. Ол чэрчитинэн Ньурба оройуонугар Ийэ месячнигын үөрүүлээх аһыллыытыгар тыалы-хаары, ардаҕы билиммэккэ элбэх дьон тоҕуоруһа муһунна.Араас быыстапкалар турдулар, дьон сэргэ болҕомтотун тартылар. Ф.Г. Сафронов аатынан кииннэммит библиотека улэһиттэрэ «Ньурба Далбар хотуттара саха литературатыгар», өссө тупсаҕай фотозона туруоран кэлбит дьону үөртүлэр. Норуоттар доҕордоһуулара музей Дора Жирковаҕа анаммыт быыстапката турда, араас сылларга хаһыакка тахсыбыт ыстатыйалары сэҥээрэ аахтыбыт. Киьи хараҕын үөрдэр, дууһатын сылаанньытар  «Ийэм, эбэм оонньуурдара», «Ийэм мичээрэ» оҕолор уруһуйдарын быыстапканы куорат оҕо уһуйааннара туруордулар. Фойеҕа Лена Эверстова happyday_nrb фотозоната кэлэн турда, Кириллин Рустам хаартыскаҕа түһэртээтэ. Ону таһынан иистэнньэҥ ийэлэр-эбээлэр, «Кыталык» КД иһинэ үлэлиир улахан дьоҥҥо «Палитра» (сал.  Васильева А.Н) уруһуй  куруһуокка дьарыктанааччылар уруһуйдара, «Сувенирнай лавкаҕа» оноһуктара дьон көрүүтүгэр турдулар. Минньигэс астаах кыргыттар  араас эгэлгэ туортары  атыылаатылар.

      Дьоро киэһэбит аһыллыытын норуот эмчитэ, алгысчыт Алиса Михайловна Иннокентьева сахалыы сиэринэн-туомунан, алгыһынан арчылаан аста.

     Ньурба улууһугар 22 дьоруой ийэ баарыттан үөрүүлээх быһыыга улуус баһылыгын бастакы солбуйааччыта Бурнашев Н.И дьоруой ийэлэргэ эҕэрдэ сурук туттартаата — Ньурба куораттан 11 оҕолоох Апросимова Светлана Иннокентьевнаҕа, Түмүк нэһилиэгиттэн 12 оҕолоох Спиридонова Лидия Николаевнаҕа, 10 оҕолоох Яковлева Дария Федоровнаҕа. Төрдүс уонна онтон кэлэр оҕолорун төрөөбүт ийэлэргэ, дьиэ кэргэттэргэ анаммыт  «Ньурба дьиэ кэргэнэ» муниципальнай ийэ хапытаалын сертификата 9 ийэҕэ, Ньурба оройуонугар Норуот көҕүлээһиннэрин сылын чэрчитинэн, Арассыыйа ийэлэрэ Ньурбатааҕы отделение бырайыагынан «Мин Ньурбаҕа төрөөбүтүм» кырачааннарга анаммыт 10 ийэҕэ туттарылынна. 3 оҕону иитэн таһаарбыт, 6 оҕону иитэ сылдьар Акана нэһилиэгиттэн Иннокентьева Анна Прокопьевна, Филиппов Алексей Иванович  «Ньурба иитиэх дьиэ кэргэнэ» мниципальнай пособие сертификата тутта. «Үтүө сүрэх » өйдөбүнньүк бэлиэни ыллылар Федора Николаевна, Лука Дмитриевич Михайловтар,  Дьаархан нэһилиэгиттэн Акулина Юрьевна, Семен Русланович Григорьевтар. Ньурба оройуонуттан мобилизацияҕа барбыт уолаттарбытыгар, ийэлии амарах сүрэхтэринэн салайтаран гуманитарнай көмө тэрийэргэ бэйэлэрин кылааттарын киллэрбит күн күбэй ийэлэргэ, бу үлэни иилээн-саҕалаан тэрийбит «Россия ийэлэрэ» Ньурбатааҕы отделениятын салайааччыта Саргылана Петровна Седалищеваҕа    Ньурба оройуона муниципальнай оройуон  аҕа баһылыгын Алексей Михайлович Иннокентьев Махтал суругун  тутан үөрүүлэрэ үксээтэ.

      Ньурба куорат муниципальнай тэриллии баһылыга Геннадий Васильевич Игнатьев 11 оҕолоох Апросимова Светлана Иннокентьевнаҕа тыыннаах сибэкки дьөрбөтүн, сэмэй бэлэҕин туттарда. Оройуон уонна куорат дьахталларын сүбэтин аатыттан Майя Олеговна Николаева бары мустубут ийэлэри ис сурэхтэн эҕэрдэлээтэ.

    Сцена бэтэрээннэрэ Тамара Семенова «Алааһым арылы кустуга», Гаврил Монастырев «Ийэҕэ махтал» Тимофей Шестаков байааҥҥа доҕуһуолунан ырыаларын бэлэхтээтилэр. Антоновкаттан «Дуорай» эр дьон ансаамбыла (салайааччы Петр Белолюбскай)  дьон сэргэ сэҥээриитин ыллылар. «Ситим» үҥкүү ансаамбыла (салайааччы Петрова ЗТ), Анжелика Седалищева туруорбут үҥкүүлэрэ кэрэ эйгэҕэ көтүттүлэр.

    Хомойуох иһин, уот суоҕунан былааннаммыт площадкаларынан үлэлэр буолбатылар. Үөрүүлээх аһыллыы Тамара Федоровна Федорова оһуохайынан түмүктэннэ.

  Левина М.М. Фотографии Лазаревой А.А., Кириллина Р.

Алтынньы 25 күнэ 2022 сыл

Добавить комментарий

Ваш адрес email не будет опубликован. Обязательные поля помечены *