“Улуу далаан олонхо”

Өрөспүүбүлүкэтээҕи Олоҥхо декадатыгар Н.И.Харитонов –Николай Чуор аатынан “Кыталык ” КД  “Үөрэҕирии уонна култуура” программа  чэрчитинэн

“Улуу далаан Олоҥхо” научнай – практическай конференцияны ыытта. Онно Күндээдэ  орто оскуолатын 9 кылааһын үөрэнээччитэ Айталина Никифорова “Ньурба олоҥхотун ааттарын уратыта” диэн олус кэрэхсэбиллээх доклады оҥорон, бастакы миэстэни ылыан ылла. Инникитин бу үлэтин өссө кэҥэтэн үлэлиэҕим диэбитин, сэргии иһиттибит.    Ньурба 2-дээх орто оскуолатын 8 “б” кылааһын үөрэнээччитэ Анисимов Ньургун  “Олоҥхоҕо тэҥнээһиннэри туттуу” диэн  үлэтин иһиттибит уонна биир паапкаҕа наардаан сылдьар тэҥнээһиннэрин холобурун көрөн баран, элбэх үлэ үлэлэммитин сөҕө көрдүбүт. Ньургун иккис үрдэлгэ эрэллээхтик таҕыста.  Сүлэ орто оскуолатын 10 кылааһын үөрэнээччитэ Ньургуяна Старостина “Олоҥхонон задачалар” диэн эмиэ интэриэһинэй доклады билиһиннэрдэ. Оскуола оҕолоругар олус туһалаах, интэриэһи тардар үлэ диэн сыаналаатыбыт. Онон Ньургуяна үһүс  үрдэли ылла.

     Үөрэнээччилэри сэргэ учууталлар эмиэ кытыннылар. Ол курдук Ньурбатааҕы техникум саха тылын,литературатын учуутала Казакова Алена Валерьевна “Бүөтүр Оҕотоойоп “Элэс Боотур” олоҥхотугар тэҥнээһиннэри туттуу” диэн үлэтинэн кытынна. Онтон Күндээдэттэн физкультура учуутала Никифоров Эрик Петрович “Олоҥхоһут — Николай Иванович Степанов- Ноорой” диэн доклад оҥоро биһирэннэ. Эрик Петрович бэйэтэ олоҥхону сөбүлээн толорор буолан, салайар кылааһыгар олоҥхо туруоран, күрэххэ кыттан улахан ситиһиилэрдээхтэрэ биһигини улаханнык сөхтөрдө. Аныгыскы кыттыыбар киирэн олоҥхолуоҕум диэн үөртэ. Чуукаардааҕы “Эйгэ” норуот айымньытын киинин уус-уран салайааччыта Сивцев Андрей Ильич –Лэкээрин  Дьокуускай куораттан форумҥа кыттан кэлэн иһэн, “Сахатыйыы” диэн тиэмэҕэ тылбытын ,баай полкулуорбутун, Улуу далаан олоҥхобутун,итэҕэлбитин таарыйан, устар ууну сомоҕолуур уус-уран тылынан саҥаран-иҥэрэн, дьон биһирэбилин ылла. Улуу далаан Олоҥхобут алгыстаах аартыгынан сирдээн аҕалбыт ытык дьоммут-олоҥхоһуттарбыт ааттарын ааттыыр, олоҥхоһут удьуора утумнана турарын түстүүр ытык түһүлгэлэрэ кэҥии турдун!     

Добавить комментарий

Ваш адрес email не будет опубликован. Обязательные поля помечены *