IV төгүлүн ыытыллар «Я — Ваш конферансье» Сахабыт сирин чулуу ыытааччы эр дьонун биир түһүлгэҕэ түмтэ.

 IV төгүлүн ыытыллар «Я — Ваш конферансье» Сахабыт сирин чулуу ыытааччы эр дьонун биир түһүлгэҕэ түмтэ.

      Кулун тутар 18 күнүгэр, Н.И. Харитонов – Николай Чуор аатынан «Кыталык» КД өтөрүнэн умнуллубат тэрээһин ыытылынна. «Я — Ваш конферансье» диэн,  ыытааччы эр дьон Өрөспүүбүлүкэтээҕи  4-с күрэҕэ, өрүү буоларын курдук, үрдүк таһымҥа тэриллэн, ыраахтан — чугастан эдэр, тэтимнээх, эрчимнээх эр дьону түмтэ.  Дьэ,  кимнээҕий диэтэххэ: алгыстаах Амма сириттэн Дмитрий Саввинов, Манчаары дойдута Мэҥэ — Хаҥаластан Айаан Верховцев, кырылас кумахтаах Бүлүү улууһуттан Александр Иванов, Олоҥхо дойдута Сунтаартан Дьулустаан Иванов, Герман Иванов уонна Киэҥ Ньурбаттан Евгений Охотоев.

     Эр бэртэрэ, ыытааччы маанылара, тыл маастардара түөрт түһүмэҕинэн бэйэлэрин көрөөччүгэ толору арыйдылар. Санатан аастахха, былырыыҥҥы күрэх Мэҥэ — Хаҥалас улууһугар Аллараа Бэстээх култууратын киинигэр ыытыллыбыта.

     Ханнык баҕарар күрэххэ дьүүллүүр тойон сүбэ үлэлиирин бэккэ диэн билэр буоллахпыт. Быйылгы күрэхпитигэр үлэлээтилэр: Василий Николаевич Семенов, «Ньурба оройуона» муниципальнай оройуон баҺылыгын солбуйааччы – Дьүүллүүр сүбэ бэрэссэдээтэлэ, Иван Иванович Попов, Саха Өрөспүүбүлүкэтин култууратын туйгуна, Түмүк нэһилиэгин бочуоттаах олохтооҕо, Москватааҕы Сибиир уонна Уһук Илиҥҥи  норуоттар култуураларын сайдыытын фондатын Саха сиригэр ыытар тэрээһиннэрин ыытааччыта, Алгысчыт, Михаил Егорович Софронов, Октябрьскай нэһилиэк бочуоттаах олохтооҕо, Саха Өрөспүүбүлүкэтин олох – дьаһах коммунальнай хаһаайыстыбатын   ветерана, Ньурба уйгулаах ыһыахтарын солбуллубат ыытааччыта, үгүс ыччат олоҕун түстээбит  түсчүт, кэрэ кэпсээннээх тамада, Ньурба улууҺун Дархан этээччитэ, Бүлүү улууһуттан Афанасьев Николай Афанасьевич – Айдаман, Саха Өрөспүүбүлүкэтин култууратын туйгуна, Саха сирин үтүөлээх этээччитэ, түсчүт, 2020 сыллаахха Ньурбаҕа ыытыллыбыт  «Я – ваш конферансье!» ыытааччылар аһаҕас күрэхтэрин Кылаан кыайыылааҕа,Егор Михайлович Андреев, FM 101, 9 долгуҥҥа саҥарар «Ньурба» радио ыытааччыта, 2022 сыллаахха Аллараа Бэстээххэ ыытыллыбыт «Я- ваш конферансье!» ыытааччылар аһаҕас күрэхтэрин Кылаан кыайыылааҕа, 2022 сыл түмүгүнэн оройуоҥҥа – «Сыл бастыҥ ыытааччыта» анал аат хаһаайына, Иванова Людмила Дмитриевна, Өрөспүүбүлүкэтээҕи «Өбүгэ ситимэ» норуот эмчиттэрин ассоциациятын чилиэнэ.

      Сценаҕа кэрэ түһүлгэ силигин ситэрээччи, кэрэ куолаһынан, номоҕон дьүһүнүнэн күрэх кыттааччыларын, көрөөччүлэрин кутун тутта ыытааччы Лена Петрова.

       Күрэх түмүгэ дьэ хайдах буолла диэн интириэһиргиир буолуохтааххыт. Ким эрэ бастыахтаах, хотуохтаах буоллаҕа. Тиритиилээх күрэх кэннэ анал ааттары анаталааһын  маннык буолла: «Креатив конферанс» анал аат хаһаайына буолла Сунтаартан Герман Иванов, «Ведущий академической манеры ведения» анал ааты сүктэ Сунтаартан Дьулустаан Иванов, «Ведущий развлекательных шоу-программ» анал аат хаһаайына буолла Мэҥэ-Хаҥаластан Айаан Верховцев, “Индивидуальный стиль” анал аат кыайыылааҕа — Ньурбаттан Евгений Охотоев, көрөөччү биһирэбилин ылла Амматтан Дмитрий Саввинов, билиҥҥи үйэ ирдэбилинэн «Победитель ИНТЕРНЕТ — ГОЛОСОВАНИЯ» анал ааты сүктэ Бүлүү уола – Александр Иванов. Элбэх истиҥ ис хоһоонноох тыл этиллибитин кэннэ, күрэх кыайыылаахтарын иһитиннэрдилэр : 3 миэстэни ылла саҥалаах – иҥэлээх Бүлүүттэн Александр Иванов, 2 миэстэҕэ таҕыста Ньурбаттан Евгений Охотоев, 1 миэстэни ылла Мэҥэ – Хаҥалас улууһун Аллараа Бэстээҕиттэн – Айаал Верховцев уонна  IV төгүлүн ыытыллар өрөспүүбүлүкэтээҕи эр дьоҥҥо ыытааччылар күрэхтэрин Кылаан Кыайыылааҕынан буолла – Амматтан Дмитрий Саввинов.

Бу тэрээһин, көрөөччү сүргэтин көтөҕөр күрэх ааптара СӨ ыччакка политикатын туйгуна, «Кыталык» КД  специалиһа Римма Ивановна Сидорова. Сыл ахсын күрэххэ кыттааччы эбиллэн, географията кэҥээн иһэр. Ол аата, атын улуустарга үлэлии — хамныы сылдьар ыытааччы эр дьон болҕомтотун тутар, интэриэһи үөскэтэр буолбутун туоһута.

Эһиилги, 5 сыллаах кыра юбилейнай, күрэх Амма улууһугар ыытыллар буолла. Атын улууска баран тэрээһин тэрийии — бу Ньурбалар бэйэбит үлэлиир уопуппутун тарҕатыы, атын улуустартан уопут ылыы буолар. Бу култуура үлэһитигэр улахан кылаат, толору саппаастаах сундуук буолар.

«Я-Ваш конферансье» айар — түмэр «Кыталык» — тан аартыгын арынан, уһун-киэҥ айаны айанныы сырыттын.

                                                                         Иван Попов – Алгыс суруйуута.