Сандал сааскы нуурал киэһээ Ньурба куоратын олохтоохторо, «Кыталык» култуура дыбарыаһыгар «хойутаан эрэбит..» диэн ыксаабыттыы эмиэ да сибиэһэй салгыны сии таарыйа аа-дьуо хааман тоҕуоруһа муһуннулар. Бу дьоро киэһэҕэ, эдэр саастарын ахта – саныы өтөрүнэн буолбатах бэртээхэй концертка муһуннулар.
90-с сылларга, ол саҕана сонун, уолаттар эрэ сатыыр гитараларын толору баһылаан, эриэккэс ааттаах Ася диэн кыыс, нап – нарын куолаһынан истээччилэр куттарын тутан, «Ньурбам ылбаҕай ырыаһыттара» бырайыак ааптара, СӨ култууратын туйгуна Максим Федоров – Ырыа Махсыым ыҥырыытын ылынан, бу киэһэ атастарын түмэн бэртээхэй кэнсиэр бэлэхтээтэ.
Кэнсиэрди иилээн – саҕалаан ыыттылар 90-с сыллар оҕолоро, Лена Степанова уонна Светлана Васильева. Бүгүҥҥү уобарастара ол сылларга толору эппиэттиир таҥастаах – саптаах, кэлбит дьон аҕыйах бириэмэҕэ күннээҕи түбүктэрин умнан, эдэр саастарын санаан, кэнсиэр тухары ытыстарын тыаһын харыстаабакка таһыннылар.
Кэнсиэр режиссера СӨ култууратын туйгуна Варвара Плотникова бу бырайыакка ылсарыгар урут ыллыы – туойа сылдьыбыт сулустары Андрей Мальцевы, Мичил Кононовы, Аркадий Кононовы уо д.а. бу киэһэ таһаарар сыалтан күүскэ үлэлэһэн, сөбүлэҥнэрин ылан, түүннэри — күнүстэри күүстээх репетиция ыытан, умна быһыытыйбыт сулустар бэйэлэригэр эрэнэн, бу киэһэ үрдүк сыанаҕа тахсан дохсун ытыс тыаһыгар уйдардылар.
Ася кэнсиэрбэр тыыннаах доҕуһуол баара буоллар диэбитин өйөөн, хас да ырыа тыыннаах доҕуһуолунан толоруллунна. Өр сылларга хит буола сылдьыбыт ырыалары бүгүҥҥү кэнсиэр кыттыылаахтара айбыттарын — туппуттарын сорох көрөөччү саҥа иһиттэ, сөхтө – махтайда. Бу кэнсиэр бырайыак толору сыалын ситэн, бу дьоро киэһэ Ньурбаттан төрүттээх, мелодист, автордар ырыалара үрдүк сыанаттан
Бырайыак өссө да элбэх Ньурба ырыаһыттарын киэҥ араҥаҕа таһаарар былааннаах. Ася бу киэһэ Ньурба куоратын олохтоохторугар уонна ыалдьыттарыгар дьоро, ахтылҕан киэһэтин бэлэхтээбитигэр махтанан туран үлэтигэр, айар аартыга өссө да арылла турдун диэн туран үрдүк ситиһиилэри баҕарабыт.
