«Кыталык» КД оройуоннааҕы ветераннар спартакиадаларын чэрчитинэн пааранан бальнай үҥкүүгэ күрэх буолан ааста.

Бэҕэһээ, муус устар 12 күнүгэр Убайаан спорт саалатыгар остуол тенниһигэр, пневматическай саанан сыалы ытыыга уонна буккаас эстафетата «Олимпик» спорт саалатыгар буоллулар. Күнүс 15 ч. «Кыталык» КД пааранан бальнай үҥкүүгэ көрүү күрэх буолла. Барыта бу көрүҥҥэ Ньурба куораттан, нэһилиэктэртэн 15 паара кыттыыны ылла. Ох курдук оҥостон үҥкүү үс көрүҥүн  Тимофей Шестаков баянын доҕуһуолугар көрөөччүлэр сөҕүөхтэрин, бэрт чэпчэкитик  үҥкүүлээн тэлээрдилэр.

   Тойон сүбэҕэ үлэлээтилэр Ньурба искусство оскуолатын хореографтара: СӨ Үөрэҕириитин туйгуна Попова М.А., СӨ Ыччат политикатын туйгуна Семенов М.М., СӨ култууратын туйгуна Саввинова  Н.И. уонна Н.И.Харитонов – Николай Чуор аатынан «Кыталык» КД үҥкүүһүтэ  Софронеева А.И.

   Тойон сүбэ быһаарыытынан үһүс миэстэни ыллылар Антоновкаттан Федорова Тамара Федоровна, Федоров Егор Нилович, иккис миэстэҕэ Маалыкайтан Варвара Афанасьевна Саввинова, Григорьев Николай Тимофеевич уонна бастакы үрдэлгэ таҕыстылар Маалыкайтан Елизавета Петровна Егорова, Виталий Спиридонович Михайлов. Бу күрэх үчүгэй сонуннаах буолан биэрдэ : бастакы , иккис миэстэни ылбыт кыттааччылар ыаллыы Сунтаар улууһугар үҥкүү күрэҕэр кыттыыны ыла баралларыгар сертификат туттулар.

Пааранан бальнай үҥкүү көрүүтүгэр кыттыбыт ветераннар дипломнары уонна кыттыы иһин сертификаттары тутан үөрэн-көтөн тарҕастылар.

Добавить комментарий

Ваш адрес email не будет опубликован. Обязательные поля помечены *