Бэҕэһээ, муус устар 21 күнүгэр, “Кыталык» култуура дыбарыаһыгар Ньурба оройуонун Аҕалар Сүбэтин көҕүлээһининэн Октябрьскай нэһилиэк олохтооҕор Степан Степановка, элбэх оҕолоох ыал аҕата искэн ыарыытыттан этэҥҥэ эмтэнэн кэлэригэр көмө – “Эрэлбит Эйиэхэ, Эр Хоһуун” аһымал акция буолан ааста.
Кэнсиэр уратыта диэн бу күн эр дьоннорбут биир сомоҕо буолан, ыраахпын чугаспын диэн аахсыбакка, оройуоммут нэһилиэктэрин баһылыктара, аҕаларын сүбэлэрэ бары киирэн кыттыыны ылбыттара буолар.
Көхтөөх көрөөччү ытыһын тыаһыгар ырыаһыттар, сорохторо сыанаҕа бастакы сүрэхтэниилэрэ буолан, долгуйан туран ыллаатылар. Бииртэн биир кэрэ куолас ыллыырын, кэнсиэри көрө кэлбит дьон дуоһуйа истэн үөрдүлэр – көттүлэр, сыаналаатылар.
Кыттааччылар үксүлэрэ тыаттан сылдьар буолан: “Кэнсиэрпитигэр үүт-сүөгэй аһы аукционнаабаппыт дуо?” — диэн этии киллэрэн, спонсордары көрдөөн, үлэ баран, элбэх киһи туора турбакка, биэс оҕолоох ыал аҕатыгар көмө буолларбын диэн, бу киэһэ үүт-сүөгэй, бэйэ оҥоһуута халбаһыы, арыы, араас күннээҕигэ туттуллар тэриллэр, бэл диэтэр кыыл табаны бултуурга көҥүл ылар лицензияҕа тиийэ бириистэри туруордулар: “Байар” СХПСПК, “Сиибиктэ” КФХ, “Влада” СППК, “МТС Нюрба Агро” АО, “Кировский Угольный Разрез” АО, ИП Альберт Васильев.
Дьон болҕомтотун күүскэ кэнсиэр быыһыгар ыытыллыбыт аукцион тарта. Үрүҥ ас эгэлгэтэ, хаһаас сиир арыы, копчуонай халбаһыы набуорун, бытовой тиэхиникэни сатабыллаах дьон ырыынак сыанатыттан чэпчэкигэ ылла. Бүтэһигэр Филиппова Надежда Геннадьевна салайааччылаах «Байар» СХПСПК туруорбут кыыл табаны бултуурга көҥүл лицензия лота таҕыста, үүт аһы үксүн дьахтар аймах аукционнаһа олорбут буоллаҕына, бу лот кэлбитигэр эр дьон сэргии түстэ. Бастакы суумма түөрт тыһыынчаттан саҕалаан, бэрт түргэнник тоҕуска тиийдэ, эбиитин ыытааччылар уон тыһыынча суумматтан таҕыстаҕына – бонус баар диэн өссө кымньыылаан биэрдилэр. Буонуска кыыл табаттан ураты — эбии биир бөрөнү, биир саһылы уонна үс кииһи бултаныан сөбүн билэн, бу лот уон биэс тыһыынчаҕа диэри тахсан, хамаҕатык барда.
Баһылыктар толорууларыгар “Биһиги баарбыт сахалар” ырыалара көрөөччүгэ патриот хаанын уһугуннаран дохсун ытыс тыаһын ылыан ылла, бары сахалыы таҥастаах, дойдубут былааҕын тэлибирии кыастар кэтэх урсунугар уйдаран салҕыы фойеҕа тоҥолохтон тутуһан аһымал кэнсиэр оһуохайынан түмүктэннэ.
Түгэнинэн туһанан биир дойдулаахпыт этэҥҥэ эмтэнэн кэлэн, кып – кырачаан оҕолоругар дурда-хахха буоларыгар күүс – көмө буолбут бары спонсордарбытыгар махтал тылын бастыҥын этэбит.
Акция түмүгүнэн киирии билиэтинэн 102.500, уурунаҕа 7700, аукциоҥҥа 44250 холбоон уопсайа 154450 солкуобай киирэн, уолбут Степан кэргэнигэр туттарылынна.
Ньурба оройуонун Аҕалар Сүбэтэ бастакы тэрийбит акциялара эр дьоммут түмсүүлээхтэрин көрдөрөн, инникитин даҕаны бары маннык бэйэ – бэйэни өйөнсөн биир күүстээх сомоҕо буолуохтара диэн эрэнэбит!
