Бүгүн, ыам ыйын 8 күнүгэр сааскы сылаас күн «Кыталык» КД тыыл бэтэрээннэрин, сэрии оҕолорун, ытык кырдьаҕастары чиэстиир, күннээҕи түбүктэн сынньатар, үөлээннээхтэрин кытта көрүһүннэрэн ирэ – хоро кэпсэтиннэрэр сыаллаах, Улуу Кыайыы 78 сылын көрсө бырааһынньыктааҕы сынньалаҥ биэчэрэ буолан ааста.
Бу күн истиҥ тыллардаах эҕэрдэлэри эттилэр “Ньурба оройуона” МО баһылыгын солбуйааччыта Н.С.Петрова, “Ньурба куорат” МТ баһылыга Г.В.Игнатьев, Ньурба оройуонун бэтэрээннэрин Сэбиэтин бэрэссэдээтэлэ Т.П.Олесова, Ньурба оройуонун Ытык Сэбиэтин бэрэссэдээтэлэ Н.В.Николаев, Ньурба оройуонун эдэр ыччат политикатын салайааччыта В.Г. Владимирова уонна Н.И.Харитонов – Николай Чуор аатынан “Кыталык” КД дириэктэрэ С.Б.Дондокова.
Гимнастеркалаах оҕолор ыалдьыттары сылаас алаадьылаах мааны сандалы тула олордон, сүүрэн – көтөн итии үүттээх чэйдэрин кутан, бүөбэйдээн, Ньурбатааҕы кырдьаҕастар дьиэлэрин үлэһиттэрэ буһарбыт салдаат хааһытын амсаттылар, ытык кырдьаҕастарбыт сэрии саҕанааҕы ырыалары баян тыаһынан ыллаатылар, уруккуну — хойуккуну аҕыннылар, дуоһуйуохтарыгар дылы кэпсэтэн, хаартыскаҕа түһэн, култууралар туруорбут кэнсиэртэрин көрөн астыннылар.
Түгэнинэн туһанан бу тэрээһини тэрийсэргэ күүс – көмө буолбут дьоммутун «Мясной Двор» маҕаһыын салайааччытыгар Бястинов Григорийга , “Витаминчик” маҕаһыын салайааччытыгар Акмалжон Анваржоновичка, «Байар» СХПК салайааччытыгар Филиппова Надеждаҕа, «Туймаада» рынок салайааччытыгар Степанов Анатолийга барҕа махталбытын тиэрдэбит, үлэлэригэр үрдүк ситиһиини, саҥа саҕахтары, дьиэ кэргэннэригэр дьолу — соргуну баҕарабыт!
Үөрүүлээх биэчэр оһуордаах оһуокайынан түмүктэннэ.
