Ыам ыйын 26 күнүгэр «Кыталык» култуура дыбарыаһыгар Ньурбачаан нэһилиэгин оҕото Афоня Самсонов Москва куоракка операцияҕа барарыгар көмөлөһөр сыаллаах «Эн миигинниин бииргэ буол» диэн аһымал кэнсиэрт буолан ааста.
Кэнсиэри «Гулливер» оҕо театрын кыттыылааҕа, Ньурбатааҕы элбэх хайысхалаах гимназия үөрэнээччитэ Иннокентий Яковлев уонна Мария Оппудонова иилээн – саҕалаан ыыттылар.
Бэйэлэрэ да долгуйа сылдьар кырачаан кыттааччылары өйүү кэлэн тыл эттэ Улуус баһылыга Алексей Михайлович Иннокентьев, бу тэрээһини тэрийэн ыыппыт улуустааҕы социальнай көмүскэл управлениеятыгар уонна «Кыталык» КД бары үлэһиттэригэр махталын биллэрдэ. Эҕэрдэ тылын уонна махтал суруктары туттарда Ньурбатааҕы инбэлииттэр уопсастыбаларын бэрэссэдээтэлэ Александр Еремеевич Алексеев, улуустааҕы көрбөттөр обществоларын бэрэссэдээтэлэ Светлана Семеновна Яковлева, ону таһынан бүгүҥҥү выставкаҕа бэйэлэрин үлэлэрин туруорбут кыргыттарга Васильева Таняҕа уонна Андреева Варяҕа эҕэрдэ сурук туттартаата Ньурбатааҕы оҕо искусствотын оскуолатын уруһуй куруһуогун учуутала Ильина Зинаида Егоровна. Истиҥ махтал тылларын эттилэр Ньурбатааҕы судаарыстыбаннай көһө сылдьар драматическай театр дириэктэрэ Николай Иванович Никитин уонна Александра Константиновна Кривогорницина ону таһынан сэмэй бэлэхтэрин долгуйан туран коллегаларын кыыһыгар Васильева Таняҕа быыстапкаҕа көхтөөхтүк кыттыбытын иһин туттардылар.
Бу аһымал кэнсиэрт уратытынан доруобуйаларыгар хааччахтаах оҕолор бэйэлэрин кыахтарынан оройуон тэрилтэлэрин салайааччыларын кытта бииргэ кытыннылар. Ол курдук Ньурбачаан нэһилиэгин дьаһалтатын баһылыга Мария Семенованы кытта Айсен Аммосов уонна Оксана Степанова улаханнык долгуйан туран кэнсиэри саҕалаатылар. Салгыы эстафетаны Ньурбатааҕы социальнай фонда салайааччытын Владимир Моисеевы кытта Максим Сертюков, онтон Ньурбатааҕы тубдиспансер сэбиэдиссэйэ Вера Необутованы кытта Айталин Иванов, Саха Өрөспүүбүлүкэтин Үтүөлээх артыыһа, култуура Департаменын начальнигын солбуйааччы Илья Николаевы кытта Анжелика Архипова көрөөччүгэ ырыаһыт бастыҥнара буолалларын көрдөрдүлэр. Ньурбатааҕы улуустар икки ардыларынааҕы дьиэ кэргэҥҥэ уонна оҕоҕо комплекснай көмөнү оҥорор киин иитиллээччилэрэ Саскылаана Амбросьева, Антон Борисов, Толя Маччатыров, Юра Софронов киин салайааччытын Марианна Алексееваны кытта этнономерынан, кырачаан Ярослав Касьяновы кытта Ньурбатааҕы 15 нүөмэрдээх Бюро МСЭ салайаачыта Наталья Семенова, медрегистратор Саргылаана Иванова үҥкүүлээн тэйдилэр.
Кэнсиэрт иккис аҥаарыгар «Биһик» Антоновкатааҕы оҕону сайыннарар киин сэбиэдиссэйэ Валентина Афанасьева Аделина Егорованы кытта төрөөбүт тыл туһунан истиҥ ырыа ыллаатылар. Ньурба оройуонун эдэр ыччат уонна имиджевай политика салалтатын салайааччытьа Валерия Владимирова Виталий Ивановка музыканан доҕуһуоллаата, ылласта .
Изамира Семенова салайааччылаах Ньурбатааҕы улуустар икки ардыларынааҕы кырдьаҕастар уонна инбэлииттэр интернат дьиэлэрин «Иэйии» үҥкүү ансамблын туруоруутугар «Тальяночка» үҥкүүнү көрөөччүлэргэ бэлэхтээтилэр, Ньурба куорат дьаһалтатын баһылыгын социальнай боппуруостарга салайааччыта Мария Куличкина Каролина Павлованы кытта бэртээхэй дуэт толордулар. Ньурбатааҕы улуустар икки ардыларынааҕы дьиэ кэргэҥҥэ уонна оҕоҕо комплекснай көмөнү оҥорор киин иитиллээччилэрэ остуоруйа оонньоон артыыс талаанын бастыҥа баарын көрдөрдүлэр. Чаппанда талааннаах уола Саша Опудонов Үөрэҕирии салалтатын салайааччытын Федор Ушкановы кытта тэбэнэттээх ырыаларын көрөөччүгэ бэлэхтээтиилэр. Ньурба оройуонун үпкэ управлениетын салайааччыта Алена Семенова, Ньурбатааҕы кииннэммит бухгалтерия салайааччыта Алена Яковлева Кеша Яковлевтыын, Ярик Касьяновтыын уонна Женя Михайловы кытта үҥкүүлэрэ көрөөччүнү барытын биһирэттэ. «Үҥкүү – олоҕу хамсатар күүс» диэни бигэргэтэн уолаттар ити кэннэ Ньурба оройуонун сүрүн архитекторын Анастасия Азарованы кытта уонна оройуон дьаһалтатын бухгалтерскай учуокка отделын кылаабынай специалиһын Алена Иванованы кытта «Көрдөөх ковбойдар» диэн үҥкүүнү бэлэхтээтилэр.
Кэнсиэрт үһүс чааһын Сулустаан Яковлев Ньурба көһө сылдьар драматическай театрын артыыстара Лена Яколвеваны уонна Майя Слепцованы кытта «Дьол» диэн ырыаны ыллаан саҕалаата, толору дьоллоох буолла. Ньурбатааҕы социальнай көмүскэл управлениетын салайааччыта Ирина Находкина Эрхан Захаровы, Алена Васильеваны кытта ырыаһыт бэртэрэ буолан биэрдилэр. Оҕолорбут ырыаны – үҥкүүнү эрэ буолбакка араас интсрумеҥҥа кытта оонньууру бэркэ сатыыллар, ол курдук сайын кэлбитин биллэрэн лыҥкынас хомуска Айаал, Оксана Тимофеевтар Ньурбатааҕы улуустар икки ардыларынааҕы дьиэ кэргэҥҥэ уонна оҕоҕо комплекснай көмөнү оҥорор киин специалиһын Оксана Данилованы кытта хомуска оонньоон дьүрүһүттүлэр.
Ытык кырдьаҕастарбыт да бу күн оҕолортон хаалсыбатылар, ол курдук Ньурбатааҕы улуустар икки ардыларынааҕы кырдьаҕастар уонна инбэлииттэр интернат дьиэлэрин олохтооҕо Мария Комиссарова интернат – дьиэ үлэһитин Григорий Седалищевы кытта дуэттаатылар. Ньурбабыт биир мааны куоластааҕынан биллэр салайааччыта – РИК «Автодор» салайааччыта Сергей Никифоров Чукрова Санитаны уонна Виолетта Степанованы кытта «Балыктаах киэһэтэ» диэн хит ырыаны ыллаан дохсун ытыс тыаһынан арыалланнылар. Ньурбатааҕы Ис Дьыала органнарын инспектора Мария Кириллина уонна Госавтоинспекция инспектора Роман Обоев Валерия Борисованы кытта бэртээхэй трио буолан таҕыстылар. «Оҕо – олохпут киэргэлэ, сибэккитэ» диэн бэргэн этиини туоһулаан кырачаан оҕолорбут Ньурбатааҕы «Мои документы» офис салайааччытын Наталья Капитонованы кытта сибэкки буолан үҥкүүлээн көрөөчү хараҕын халтарыттылар, сайыҥҥы сибэккинэн туолбут Куочай сыһыытын санаттылар.
Ити курдук, «Эн миигинниин бииргэ буол» аһымал кэнсиэркэ барыта 104650 солкуобай харчы киирэн Ньурбачаан нэһилиэгин оҕото Афоня Самсонов Москва куоракка баран эмтэнэн үтүөрэн кэлэригэр көмө буолуоҕа. Онтон кэнсиэргэ кыттыбыт биһиги кэнчээри кэскиллэрбит олоххо кыаллыбат суоҕун өссө төгүл бигэргэттилэр. Күндү оҕолорбутугар куруук доруобай, үөрэ – көтө сырыттыннар диэн туран үтүө санаа, амарах дууһа, сылаас сыһыан, күүстээх өйөбүл өрүүтүн да баар буола турдун диэн алгыс тылбытын аныыбыт!
