Бүгүн, бэс ыйын 8 күнүгэр С.Васильев аатынан култуура уонна сынньалаҥ пааркатыгар Бүлүү бөлөх оройуоннарын бэтэрээннэр VII спартакиадаларын үөрүүлээх аһыллыыта ыытылынна. Спартакиадаҕа ыаллыы сытар Сунтаар, Үөһээ Бүлүү, Бүлүү улуустара кыттыыны ыла кэлбиттэр, бу күрэхтэһиигэ барыта 110 кытааччы сайаапкаларын биэрбиттэр.
Үөрүүлээх арыллыы хамаандалар парадтарынан саҕаланна. Параады салайда спартакиада кылаабынай судьуйата мас-рестлинг үрдүк категориялаах тренера СӨ физкультураҕа уонна уонна спордун туйгуна, Ньурба оройуонун физкультура уонна спорт бочуоттаах үлэһитэ Иннокентий Иванович Семенов. Колоннаҕа бастакынан ыраахтан айаннаан кэлбит, Бүтэй Бүлүү биэрэгэр бүгэн үөскээбит, Саха сирин биир кырдьаҕас Бүлүү куората кииннээх, дьоһун дьонноох сэргэлээх Бүлүү улууһун спортсменнара, иккиһинэн – ыксалаһан олорор ырыа – тойук аргыстаах ытык – мааны Үөһээ-Бүлүү спорсменнара, үсүһүнэн- үтүө-мааны айылҕалаах, ырыаһыт – үҥкүүһүт ыччаттардаах «Олонхо дойдута» — Сунтаар улууһун бэтэрээннэрэ уонна төрдүһүнэн – киэҥ нэлэмэн сыһыылардаах, алмаас күлүмэ сардаҥалардаах, ыалдьытымсах дьоннордоох Ньурба оройуонун спортсменнара хаамтылар.
Мустубут дьоҥҥо буолаары турар күрэххэ ситиһиини, кыайыыны баҕаран туран Алгыһын анаата СӨ култууратын туйгуна Иван Иванович Попов – Алгыс.
Санатан этэр эбит буоллахха, спартакиада ыраах 1997 сыллаахха Кэбээйи улууһугар буолбутугар Ньурбаттан көхтөөх хамаанда баран кыттан кэлбитэ. Хамсык мэһэйдээн улахан тохтобул кэнниттэн, бүтэһигин 2022 сыллаахха Сунтаар улууһугар буолбутугар тоҕус көрүҥҥэ кыттан ньурбалар үһүс бириистээх миэстэҕэ тиксэн үөрүүлэрэ үксээбитэ.
Бу спартакиада сыала – соруга бэтэрээннэргэ болҕомто ууран, эт – хаан өттүнэн сайыннарар үлэни күүскэ ыытыы, аҕам саастаахтарбытын бэйэ-бэйэлэрин кытта билсиһиннэрии, уһун үйэлэниигэ, чөл олоххо иитии буолар.
Үөрүүлээх быһыыга – майгыга күөх Ньурба сиригэр ытык ыалдьыттары көрсөр эҕэрдэ тыллары эттилэр: «Ньурба оройуона» МО дьаһалтатын баһылыгын эбээһинэһин толорооччу Николай Иванович Бурнашев, «Ньурба куората» МТ дьаһалтатын баһылыга Геннадий Васильевич Игнатьев, Сэрии уонна ветераннарын общественнай тэрилтэлэрин уонна СӨ Сэбилэниилээх күүстэрин уонна быраабы харыстыыр уорганнар общественнай тэрилтэлэрин солбуйааччы бэрэссэдээтэлэ, СӨ “Гражданскай килбиэн” хаһаайына, СӨ үтүөлээх юриһа, Василий Николаевич Васильев, Ньурба оройуонун ветераннарын Сэбиэтин салайааччыта, СӨ култууратын үтүөлээх үлэһитэ Татьяна Прокопьевна Олесова.
Эҕэрдэ тыллар этиллибиттэрин кэннэ, спартакиада кылаабынай судуьуйата, мас-рестлинг үрдүк категориялаах тренера, СӨ физкультураҕа уонна спортка туйгунун, Ньурба оройуонун физкультура уонна спортка бочуоттаах үлэһитэ Семен Иннокентьевич Иванов кытааччыларга ситиһиини баҕарда.
Түгэнинэн туһанан Ньурбабыт оройуонун спордугар, общественнай үлэтигэр элбэх сыралаах кылааттарын киллэрбит бэтэрээннэрбитигэр үрдүк наҕараадалар, бочуоттаах грамоталар туттарылыннылар, ол курдук: “СӨ бочуоттаах бэтэрээн” ааты иҥэрдилэр Бордоҥ нэһилиэгин Бочуоттаах олохтооҕор Николаев Николай Наумовичка, Өрөспүүбүлүкэтээҕи сэрии уонна үлэ бэтэрээннэрин Сэбиэтин Бочуотунай грамотатын туттулар: Халабышев Никита Иванович — Бордоҥ нэһилиэгин активиһа,остуол тенниһигэр өрөспүүбүлүкэ, улуус чемпиона, Бордоҥнооҕу «Иэйии» үҥкүү ансаамбылын чилиэнэ, Тыасытова Александра Григорьевна — Бордоҥ нэһилиэгин «Аартык» литературнай ааҕыы түмсүү чилиэнэ, общественница, Замятина Светлана Алексеевна — уонтан тахса сыл Күндээдэтээҕи бэтэрээннэр Сэбиэттэрин, «Алгыс» эбээлэр кулууптарын салайааччыта, Егорова Елизавета Петровна — Бордоҥ нэһилиэгин «Иэйэхсит» бэтэрээннэр хамсааһыннарын салайааччыта, «Красная гвоздика» Бүтүн Арассыыйатааҕы акция кыттыылааҕа, Фокин Николай Иванович — спортсмен, Дьиикимдэ нэһилиэгин бэтэрээннэр хамсааһыннарын общественнига, Иннокентьев Револий Семенович — спортсмен, Түмүк нэһилиэги активиһа, общественнига, Егоров Виктор Николаевич — «Ньурба куорат» МТ бэтэрээннэрин Сэбиэтин бэрэссэдээтэлэ, Борисов Борис Иванович — «Ньурба куорат» МТ бэтэрээннэрин Сэбиэтин чилиэнэ, активиһа, Сербина Лариса Викторовна — «Ньурба куорат» МТ бэтэрээннэрин Сэбиэтин чилиэнэ, активиһа, общественницата, Кузьмин Петр Петрович — «Ньурба куорат» МТ бэтэрээннэрин Сэбиэтин чилиэнэ, общественнига, активиһа.
Ньурба оройуонугар спорт сайдарыгар элбэх кылаатын укпутун иһин, «Ньурба оройуона Бочуоттаах бэтэрээнэ» үрдүк ааты ылла — Степанов Валерий Гаврильевич, маны сэргэ «Ньурба оройуона» МО баһылыгын Бочуоттаах грамотатын туттулар «Ньурба куорат» МТ бэтэрээннэрин Сэбиэтин активын чилиэннэрэ: Степанов Валерий Гаврильевич, Захарова Татьяна Алексеевна, Петрова Розалия Дмитриевна, Семенов Валерий Федорович.
Спартакиада арыллыыта күргүөмүнэн үҥкүүнэн түмүктэннэ. Икки күн тухары аҕам саастаах дьоммут күүстэрин, сымсаларын быһаарар тыҥааһыннаах күрэхтэр күүтэллэр.
Бэс ыйын 8 күнүнээҕи спартакиада бырагырааммата манан бүппэт, мантан киэһэ – «Кыталык” КД шахматка, дуобатка, паарка балаҕаныгар остуол оонньууларыгар “хабылыкка, хаамыскаҕа” күрэхтэһиилэр, бүгүҥҥү күнү түмүктүөҕэ ыалдьыттары кытта олохтоохтор түмсүү кэнсиэрдэрэ.
