Бүгүн, бэс ыйын 2 күнүгэр Ньурбабыт оройуонун эдэр спортсменнара хомуур хамаандатын Өрөспүүбүлүкэтээҕи «Спортивные Якутяне» спартакиадаҕа ситиһиилээхтик кыттан кэлэллэригэр атаарыы үөрүүлээх тэрээһинэ буолла.
Өрөспүүбүлүкэбит Ил Дархана Айсен Сергеевич оҕо спордун күүскэ өйүүрүн бары билэбит. Саҥа үөрэх дьыла саҕаланыаҕыттан Ил Дархан “Спортивные Якутяне ”оҕону спортка сыһыарар сыаллаах комплекснай спартакиадалара саҕаланарын туһунан биллэрбитигэр биир бастакынан биһиги улууспут өйөөн, сүүмэрдиир тэрээһиннэри ыытан, чулуулартан чулуулары талан бу спартакиадаҕа ыытан эрэр. Бу барбыт оҕолоро бэс ыйын 5 күнүгэр Дьокускай куоракка финалга кыттар чиэскэ тигистилэр. Эрдэ 50 – ча оҕо барбыт эбит буоллаҕына, бүгүн сорохторун – 20 оҕону айаҥҥа атаардылар. Оҕолорбут санааларын бөҕөргөтөн, Алгыһы ытыктыыр киһибит, «Аар Айыы» итэҕэлин IX кэрдиистээх алгысчыта, Үрдүкү категориялаах норуот эмчитэ, Норуоттар икки ардыларынааҕы Юнеско иһинэн норуоттар медициналарын Магистра, Таркаайы нэһилиэгин бочуоттааҕа, үлэ ветерана Алиса Михайловна Иннокентьева алгыһын анаата.
Эдэр спортсменнар ситиһии, кыайыы — хотуу көтөллөөх кэлэллэригэр тыл эттилэр : Ньурба оройуонун «Муниципальнай оройуон» МО баһылыгын солбуйааччы Василий Николаевич Семенов, Ньурба оройуонун үөрэҕириитин салалтатын начальнига Федор Федорович Ушканов, Ньурба оройуонун спортка уонна физическай культура салалтатын салайааччыта Алексеев Роберт Александрович.
Санатан этэр эбит буоллахха, бу спартакиада эһиилги Саха сиригэр ыытыллар «Азия оҕолоро» Аан дойдутааҕы оонньууга бэлэмнэниитэ буолар.
