Бүгүн Ньурбабыт куората 27-с сылын бэлиэтиир үөрүүлээх күн үүннэ. Үгэс быһыытынан куорат күнүн хорчуоппаһыттар сарсыарда эрдэттэн, халлаан төһө да тымныйдар миэстэлэрин булунан оҕуруот аһыттан, бэйэ оҥоһукка тиийэ атыылаатылар.
Сарсыарда 11 чаастан Ньурбалар киэн туттар киһибит, сахалыы рок музыка хайысхатын төрүттээчилэртэн биир бастакылара уонна бастыҥнара, ураты хатыламмат куоластаах Никииппэр Сэмиэнэпкэ аналлаах өйдөбөнньүк музыкальнай зона паамытынньыга аһыллыытыгар «Аар Айыы» итэҕэлин IX кэрдиистээх алгысчыта, Үрдүкү категориялаах норуот эмчитэ, Норуоттар икки ардыларынааҕы Юнеско иһинэн норуоттар медициналарын Магистра, Таркаайы нэһилиэгин бочуоттааҕа, үлэ ветерана Алиса Михайловна Иннокентьева Алгыһынан арылынна. Манна Никииппэр кэргэнэ, кыыһа, балта уонна чугас доҕотторо кыттыыны ылбыттара музыкальнай зона сүрэхтэниитин таһымын үрдэттэ.
Күнүс 12 чаастан киин түһүлгэҕэ бырааһынньыктааҕы тэрээһин үөрүүлээх аһыллыытыгар куораппыт активист дьонноро кыттыыны ылан сценарий ис хоһоонугар сөп түбэһиннэрэн параадтаатылар. Бу күн элбэх эҕэрдэ истиҥ тыллара этилиннилэр, наҕараадалар туттарылыннылар. Салҕыы бырааһынньыктааҕы кэнсиэргэ Ньурба куорат ырыаһыттара, ыҥырыылаах ыалдьыттар ыллаан иһитиннэрдилэр.
Киин түһүлгэ сонун күрэхтэринэн бу күн буоллулар «Көмүс түгэн» дефиле-күрэх уонна Ньурба оройуонун игирэлирин фестивала. Дефиле-күрэххэ Ньурбабыт мааны Далбар хотуттара аа-дьуо сыана устун хаамсан, араас күһүҥҥү уобарастары оҥостон кэлбиттэрин көрдөрбүттэрин түмүгэр кыайыылааҕынан таҕыста Ньурбаттан Петрова А.А. салайааччылаах «Этно-фитнес» бөлөх кэрэ аҥаардара , атын кыттааччылар кыттыы иһин махтал суруктары туттулар. Ньурбабыт оройуонугар 40 тахса игирэлэр баалларыттан бүгүҥҥү көрүүгэ 20 паара кытынна. Бу айылҕа кэрэ көстүү бэлэҕин киэҥ араҥаҕа билиһиннэрэр сыаллаах, бу фестиваль Ньурба куорат дьаһалтатын, Ньурба куорат дьахталларын Сүбэтин уонна Н.И.Харитонов- Николай Чуор аатынан «Кыталык» КД күүһүнэн ыытылынна.
Бу күн устата площадкаларынан араас интириэһинэй тэрээһиннэр ыытылыннылар, ол курдук фотозона күрэҕэ, быыстапкалар, квест-оонньуулар, «Веревочнай паарка» презентацията, «Ньурба Эрэлэ-2024» оскуола оҕолоругар саҥа күрэх уод.а. тэрээһиннэр былаан быһыытынан ыытылыннылар.
Киэһэ 19 чаастан ураты хатыламмат куоластаах Никииппэр Сэмиэнэби кытта урут бииргэ алтыспыт доҕотторо, аймахтара, ыраахтан-чугастан ыҥырыылаах ыалдьыттара кыттыылаах улахан кэнсиэрт Ньурба куорат олохтоохторугар бырааһынньыктааҕы бэлэх буолла. Бу эрэ киэһэ «Ньурба куорат» МТ өйөбүлүнэн кэлэн ыллаан-туойан бардылар Үөһээ Бүлүүттэн Никииппэр Сэмиэнэп балта Мария Алексеева, Никииппэр сиэн балта Вераника Алексеева «Мин ыллыы кэлиэ5им» республиканскай ырыа күрэҕин араас сыллардааҕы Гран –При хаһаайыттара, лауреаттара Дьокуускай куораттан Федор Унаров, Бүлүүттэн Олег Петров, Малдьаҕартан «Аргыс» бөлөх кыттыылаахтара Иван Тимофеев, Дмитрий Кононов, Александр Васильев, Ольга Ушканова, Ньурбаттан Розалия Тихонова, Владислав Васильев- Кылыһах , Александр Егоров- Һааҥка, Ася Иванова, Максим Федоров-Ырыа Махсыым, Егор Михайлов, Дора Бурнашева, Мичил Кононов, Александр Ананьев, Светлана Васильева, Анатолий Захаров, Аркадий Кононов уонна да атын Ньурба куорат чаҕылхай сулустара.
Тапталлаах куораппытын төрөөбүт күнүнэн эҕэрдэлээн туран, өссө да сайда, үүнэ-чэчирии турарыгар баҕарабыт!
#Деньгорода #Нюрба #Ньурба #НикифорСеменов #ГодсемьивРФ #ГодДетствавРС(Я)
