«Кыталык» култуура дыбарыаһа саҥа сылга – саҥа сулустары сандаарта! Ол курдук, бүгүн, тохсунньу 13 күнүгэр Эргэ саҥа дьылы көрсө бырааһынньыктааҕы «Cаҥа сылга-саҥа ааттар» кэнсиэр «Кыталык» КД ыытылынна. Элбэх бырайыактар ааптардара, ырыаһыт, мелодист, «Дьүрүйээнэ», «Сандаар» ырыа ансаамбылларын салайааччыта Иванна Иванова идиэйэтинэн бу биэчэр Ньурба куорат олохтоохторугар, ытык-мааны ыалдьыттарыгар бэлэх буолла.
Бу бырайыак инньэ былырыыҥҥаттан былааннанан, ыллыан баҕалаах дьону көрдөөһүнтэн саҕаланан, кэпсэтиитэ ыытыллан, ырыалара талыллан, антураж, сценография туруоруллан, уоту, экраны кытта үлэ баран, түмүгэ бу бүгүн сүрэхтэннэ. Саһа сытар талааннар, ыллыан баҕалаах дьон элбэхтэрин тэрийээччилэр билиэн биллибит. Хас биирдии ырыаһыты үҥкүүнэн киэргэттилэр «Сир симэхтэрэ» оҕо образцовай үҥкүү ансаамбыла (сал.А.Г.Седалищева), «Сулусчаан»оҕо образцовай үҥкүү ансаамбыла (сал.М.А.Попова), «Ситим» үҥкүү ансаамбыла (сал.З.Т.Петрова), кэнсиэри иилээн-саҕалаан ыыттылар Камелия Яковлева Маар орто оскуолатын 7 кылааһын үөрэнээччитэ, Василий Семенов Ньурба оройуонун үөрэҕириитин салалтатын иитэр уонна эбии үөрэхтээһин отделын сүрүннүүр исписэлииһэ, Таисия Кучурова, Егор Михайлов «Кыталык» КД үлэһиттэрэ, туруорааччы режиссер СӨ култууратын туйгуна Альбина Тумусова.
Бырааһынньыктааҕы кэнсиэрт икки блоктан турда, ол курдук бастакыга кыра оҕолор, иккискэ улахан дьон сыанаҕа тахсан ыллаан холонон көрдүлэр. Сорох сулустары 35 сезоммут арыллыытыгар таһаартаабыппытын кэннэ, онтон ылата дьоммут ыллыыры, сыанаҕа тахсары сөбүлээн, биһиги үтүө доҕотторбут буола сылдьалларыттан үөрэбит.
Долгуйууну саба баттаан, бүгүҥҥү бырайыак кыттыылаахтара бэрткэ кытыннылар, көхтөөх көрөөччүлэрбит ытыстарын тыаһын харыстаабакка таһынан, саҥа талааннарбытын өйөөтүлэр.
Түгэнинэн туһанан Ньурба куорат олохтоохторун, ытык-мааны ыалдьыттарын Эргэ Саҥа дьылынан итиитик-истиҥник эҕэрдэлиибит!









