«Динамичнай пирамида» бильярд аһаҕас күрэҕэ


Бүгүн, тохсунньу ый 11 күнүгэр «Кыталык» КД «Динамичнай пирамида» бильярд аһаҕас күрэҕэр Ньурба улууһун нэһилиэктэриттэн уонна ыаллыы сытар Сунтаар улууһуттан барыта 28 киһи сайаапка биэрэн, бу күнүс 11 чаастан тыҥааһыннаах күрэхтэр саҕаланнылар.
Эҕэрдэ тылы эттилэр Ньурба оройуонун оҕо спортивнай оскуолатын директорын солбуйааччыта Вячеслав Андреевич Горбатов, бүгүҥҥү күрэх кылаабынай судьуйата, СӨ спорт маастарыгар кандидат Семён Семенович Алексеев.
Хас да эргиирдээх уһун –киэҥ оонньуу киэһэ хоут түмүктэнэрэ саарбаҕаланар. Уолаттар кэтэһэ таарыйа теннистээн аралдьыйан, бэйэлэрин эргиирдэрин кэтэһэр бириэмэлэрин бэрткэ атаараллар.

Дьэ, эрэ, бэҕэһээ сарсыарда саҕаламмыт бильярдка аһаҕас “Динамичная пирамида” күрэх сарсыарданан бүтэн, тыҥааһыннаах киирсиилэр кэннилэриттэн түмүк маннык буолла: үһүс миэстэни Федоров Иван (Сунтаар), Никифоров Анастас (Маалыкай) үллэһиннилэр, иккиһи эдэр , кэскиллээх Петров Клим (Сунтаар) уонна бастакы миэстэни Ньурбаттан Алексеев Семен ылла.
Бу эр дьон күрэҕэр икки кэрэ аҥар бэйэлэрин холононон көрөн «Ньурба куорат» куораттааҕы поселение уонна Н.И.Харитонов-Николай Чуор аатынан «Кыталык» КД туруорбут бириистэринэн илии тутуурданан, өттүк хараланан бардылар.
Спорт бу көрүҥүн таптааччылар сылын аайы элбээн иһэллэриттэн киһи эр үөрэр уонна түгэнинэн туһанан, баҕалаахтары «Кыталык» КД базатыгар баар бильярд уонна уонна остуол тенниһин кулуубтарыгар кэлэн дьарыктанаргытыгар ыҥырабыт.


Добавить комментарий

Ваш адрес email не будет опубликован. Обязательные поля помечены *