Бүгүн, кулун тутар 27 күнүгэр «Кыталык» КД «Ньурба куорат» КП бэтэрээннэрин Сүбэтин көҕүлээһининэн Ньурба оройуонун аҕам саастаахтарын спартакиадаларын аһыллыыта буолла. Быйылгы спартакиада Улуу Кыайыы 80 сылыгар, Арассыыйаҕа Аҕа дойдуну, Саха сиригэр Ийэ дойдуну көмүскээччилэр сылларын чэрчитинэн ыытылынна.
Кыттаачылар мустубуттарын кэннэ адаптивнай спорт тренера, Владимиров Константин Афанасьевич эти-хааны уһугуннарар хамсаныылары көрдөрдө, салҕыы бэтэрээннэр хамаандаларынан парадтаатылар. Бу үөрүүлээх түгэҥҥэ эҕэрдэ тылы эттилэр «Ньурба оройуона» МО баһылыгын солбуйааччыта Петрова Н.С., «Ньурба куорат» КП баһылыгын солбуйааччыта Необутов П.С., Ньурба оройуонун бэтэрээннэрин Сүбэтин бэрэссэдээтэлэ Олесова Т.П., Ньурбатааҕы оҕо спортивнай оскуолатын директора Васильев Л.Н., спартакиада кылаабынай судьуйата Петров М.А.
Спартакиада арыллыытын үҥкүүнэн киэргэттилэр «Эрэлчээн» оҕо үҥкүү ансаамбыла (сал.Плотникова В.Г.).
Бүгүҥҥү күрэх хас да сиринэн ыытылынна: ол курдук, «Кыталык» КД дуобат, саахымат, сахалыы остуол оонньуулара «хабылык-хаамыска», дартс, вальс үҥкүү, онтон Убайаан спорт саалатыгар остуол тенниһэ, волейбол, сыалыы ытыы, Ньурбатааҕы техническай лицейга городки ыытылынна.
Бүгүҥҥү спартакиада түмүгүнэн чулууттан чулуулара Ньурба оройуонун хомуур хамаандатыгар киирэн, аны сайын ыаллыы сытар Үөһээ Блүү улууһугар региональнай бэтэрээннэр спратакиадаларыгар улууспут чиэһин көмүскүөхтэрэ.
Биирдиилээн көрүҥнэр түмүктэрэ «Ньурба куорат» КП телеграм-каналыгар тахсыаҕа.
