Бүгүн, муус устар ый 5 күнүгэр үгэскэ кубулуйбут кыһыны атаарыы бырааһынньыга Ленин болуоссатыгар ыытылынна. Сааскы ылааҥы эрээри — тыаллаах халлааҥҥа киһи – аймах бөҕө мустубут. Тэрээһин үөрүүлээх аһыллыытын «Кыталык» КД кулууптаах формированиелар оҕолоро саас кэлбитин илдьиттэрэ туллуктар туһунан ырыа уонна үҥкүү бэлэх ууннулар. Ньурба куорат тэрилтэлэрин культурнай-спортивнай бэстибээл кыттыылаахтарын хамаандаларын парада тэрээһини киэргэттэ.
Бырааһынньыктааҕы эҕэрдэ тылы эттилэр “Ньурба куорат” куораттааҕы поселение баһылыга Г.В.Игнатьев, “Ньурба оройуона” МО баһылыгын солбуйааччыта Петрова Н.С.
Салҕыы бырагыраамма быһыытынан «Кыталык» КД иһинэн үлэлиир айар холбоһуктарын кэнсиэрэ, ол кэннэ улахан – дьоннуун оҕолуун бары астыммыт Ньурба куоратыгар баар кыра боруода ыттары тутааччылар түмсүүлэрин араас буоруода ыттаах хаамыы-дефилелара буолла. Дьэ, манна баар эбит таҥас-сап мааныта, кыһыылаах худилар, бодилар, кып-кырачаан ыт эгэлгэтэ. Оҕолор, улахан дьон астынан кууһан, хаартыскаҕа түһэн үөрүүлэрэ үксээтэ.
Салҕыы Бүлүү биэрэгэр бириистээх остуолба кыһыны атаары биир азартнай оонньуутугар 13 баҕалаах эр бэрдэ суруттарбытыттан, алта киһи утуу-субуу тахсан бирииһи үллэстэн кээстилэр. Уолаттар былырыыҥҥытааҕар остуолба кылгаабытын уонна ыттарга табыгастаах буолбутун бэлиэтээтилэр.
Күнүс 15 чаастан сылын аайы ыытыллар «СамоварФест» күрэххэ түөлбэлэртэн уонна бэтэрээннэр түмсүүлэриттэн кыттыыны ылан хамаанданан самовары ким түргэнник оргутарыгар күрэхтэстилэр. Ону таһынан самовары мунньар коллекционердар быыстапкалаан дьон сэҥээриитин ыллылар, манна улахан самовартан бэл диэтэр 1970 сыллаах грузинскай чэй сабааркатыгар тиийэ араас сэдэх экземпляр бааллар.
Күнүс «Өйдүүбүт.Саныыбыт.Киэн туттабыт» тэрилтэлэр икки ардыларыгар куорат баһылыгын бирииһигэр ыытыллар культурнай-спортивнай бэстибээл биир көрүҥэ – көрдөөх стартар спорду сэҥээрээччилэри түмтэ.
Күн былаһын оҕолорго анаан араас тэрээһиннэр, куоталаһыылар, атынан хатааһылааһын, хаатыҥканы ыраахха быраҕыы, мөһөөччүктэринэн «охсуһуу» аралдьытар оонньуулар ыытылыннылар.
«Кыталык» КД иһигэр сарсыарда 11 чаастан кыһыны атаары иннигэр, үһүс көлүөнэ оскуолатын чэрчитинэн «Кыталык» КД ыытар араас маастар кылаастарыгар сөп түбэһиннэрэн тарбаҕар талааннаах элбэх оҕолооох ийэ Петрова Анна быыһапка биир көрүҥүн “таҥалайдыы тигиини” интириэһиргээн кэлбит 13 кэрэ аҥарга көрдөрдө. Маны таһынан «гаражная распродажа» туттар мал-сап атыыланна.
