Бу күннэргэ «Кыталык» КД улууспут биллэр коллекционера — Дьиикимдэ нэһилиэгин библиотекаря Светлана Никандровна Павлова өр сылларга муспут сэрии саҕанааҕы открыткаларын быыстапката Ньурба куорат олохтоохторугар уонна ыалдьыттарыгар анаан бэртээхэй экспонат буолан турда.
Биһиги кулууппут Светлана Никандровналыын былырыыҥҥыттан ыкса билсэн үлэлэһэ сылдьабыт. Ааспыт сырыыга нуучча улуу бэйиэтигэр А.С.Пушкиҥҥа анаан баай ис хоһоонноох быыстапка турбут буоллаҕына, бу да сырыыга уруккуну-хойуккуну санатар, сөхтөрөр, быйылгы Улуу Кыайыы 80 сылыгар, Арассыыйаҕа Аҕа дойдуну, Саха сиригэр Ийэ дойдуну көмүскээччилэр сылларыгар сөп түбэһэннэрэн уһуйаан, оскуола үөрэнээччилэригэр патриотическай сыһыаны иитэргэ табыгастаах материал буоларын уһуйааччыларга иһитиннэрэбит. Быыстапка ыам ыйын бүтүөр диэри туруоҕа, онон кэлэн көрөн, хаартыскаҕа түһэн былыргы дьыллар быыстарын сэгэтиҥ…
