Дьокуускай куорат «Сэргэлээх уоттара» Култуура киинигэр, кулун тутар 18 күнүгэр Саха эстрадатын чаҕылхай сулустара, Ньурбаттан төрүттээх ылбаҕай ырыаһыттар, Өрөспүүбүлүкэҕэ киэҥник биллэр үҥкүү ансаамбыллара Ньурбачаан нэһилиэгин дьаһалтата, Н.И.Харитонов-Николай Чуор аатынан “Кыталык” КД көҕүлээһиннэрин өйөөн, ыҥырыыларын ылынан, туора турбакка, бу сыл, тохсунньу ый 28 күнүгэр Ньурбачаан нэһилиэгэр Софроновтар дьиэ кэргэннэригэр буолбут алдьархайга көмө буолан аһымал кэнсиэркэ кыттыыны ыллылар.
Кэнсиэркэ барыта отутча нүөмэр бэлэмнэнэн, ону таһынан олохтоох ас атыыты-кутуута ыытыллан, көмө хомуйааһыҥҥа эбии кылаат киллэрсэн, кэнсиэр билиэтиниин, уурунаҕа мунньуллубут үбү кытта барыта холбоон 510.900 солкуобай киирэн, тустаах дьоҥҥо туттарылынна. Кэнсиэри иилээн-саҕалаан ыыттылар Ньурбаттан төрүттээх Анастасия Обоева уонна Максим Березин.
Аһымал акцияҕа бириэмэлэрин аттаран кэлэн кыттыспыт ырыаһыттарбытыгар, үҥкүүһүттэргэ, фольклористарга, «Сэргэлээх уоттара» Култуура киинин салалтатыгар кэнсиэртиир саала туран биэрбиттэригэр тэрийээччилэр ааттарыттан барҕа махталбытын тиэрдэбит! Кыһалҕалааҕы өйдөөн, өйөөн илиигитин утары уунан бэйэҕит кылааккытын киллэрсибиккит хайҕабыллаах суол!
