«Күн киһитэ көмүскэс, Айыы киһитэ аһыныгас!»

Убаастабыллаах Ньурба куоратын олохтоохторо, ытык-мааны кырдьаҕастара!

       Ньурба оройуонун культуратын уонна искусствотын сайдыытыгар өр кэмҥэ ситиһиилээхтик үлэлээбит, күлүү-үөрүү аргыстаах  Харитонов Аркадий Петровиһы өйдүүр-саныыр буолуохтааххыт. Кини “Кыталык” КД  таас дьиэҕэ киириитигэр саҥа аппаратураны таҥан туруоран, сценаны араас уотунан дьиримнэтэ оонньотон, фонтаны тыктаран, үгүс көрөөччү сөҕүүтүн-махтайыытын ылбыта. Олохтоох телевидение, “Үрүйэ” радиостанция барыта кини сатабыллаах илиитинэн, мындыр толкуйунан таҥыллан, нэһилиэнньэ киэҥ араҥатын хабан тахсыбыттара. Киэҥ Ньурбабыт олоҕу кытта олук уурсан чэчирии сайдарыгар төһүү күүс буолбуттара саарбаҕа суох. Онтон кэлин Ньурба театрыгар таһаарыылаахтык үлэлии сылдьан, Дьокуускайга көһөн, Саха Государственнай драматическай театрыгар бэрт айымньылаахтык үлэлии сылдьан,кулун тутар ыйга эмискэ ыалдьан көрдөрбүтүгэр олус ыарахан диагноһы туруорбуттар: “Злокачественный рак ампулярного отдела прямой кишки Т4N1M1 с метастазами в печени S6S7, IV ст.” Соҕуруу Корея эмчиттэрэ операцияҕа ыҥыраннар, эрэл кыымын саҕаннар, Аркадий Петрович онно көттө.

        Хаҥыл аттаах Хаҥалас улууһун уола биһиги Күөх Ньурбабытын бэркэ сөбүлээн иккис дойду оҥостубутун, үгүс доҕор- атас дьонноммутун, дьоллоох эдэр сааһын кэмнэрин олус чугастык саныыр,ахтар. Таптыыр доҕорун Надятын көрсөн ыал буолан, 3 оҕону күн сирин көрдөрбүттэрэ. Аркадий элбэх саҥалаах, наар үөрэ-көтө сылдьар бэрт бэһиэлэй кэпсээннээх буолан, кимиэхэ баҕарар сөбүлэтэр, “бэйэ киһитэ “ дэтэр. Бииргэ үлэлээбит коллегабыт, доҕорбут этэҥҥэ эмтэнэн кэлэригэр күүс-көмө буолуоҕуҥ! Мээнэҕэ биһиги өбүгэлэрбит “Айыы киһитэ аһыныгас, күн киһитэ көмүскэс!”-диэн эппэтэхтэрэ буолуохтаах! Сырдык санаалаах, ыраас дууһалаах киһибит ыарахан ыарыыны кытта охсуһарыгар күүс –көмө буолуоххайыҥ!

“Кыталык ”Культура дыбарыаһын салалтата уонна бары үлэһиттэрэ.

Добавить комментарий

Ваш адрес email не будет опубликован.