Аан Дойдутааҕы дьахталларын күнүн бэлиэтии «Кыталык» КД-гар киэһэ дьон бөҕө тоҕуоруһа муһунна. Бу күн өрөспүүбүлүкэтээҕи күрэххэ сүүмэрдиир Ньурба оройуонун дьахталларын “Далбар Хотун – 2023” күрэҕэ буолан ааста. Сайаапканы кэтэх хаһаайыстыбалаах, үстэн элбэх оҕолоох кэрэ аҥардар — күн күөлэһийэ оонньуур киэҥ сыһыылардаах, хонуу муҥунан хорогор муостаах, сыһыы муҥунан сыспай сиэллээх, туруу үлэһит дьоннордоох Чаппандаттан Саргылана Семенова, көй чыычаах көрүлүүр күөх солко тыалардаах, күн уота үҥкүүлүүр күлүмнэс күөллэрдээх, үөрэхтэн- үлэттэн дьоллонор дьоһун дьон түөлбэтиттэн – Чаҕыл Чаппандаттан – Валентина Антонова, кыталык үҥкүүлүүр кырдаллаах, кыыс намчы Сэргэлээх үрэхтээх, күөх сирэм симэхтээх өҥ буордаах Өҥөлдьөттөн – Айталина Андреева, Дьаппыыда үрэх хаймыылаах, Дьөҥкүүдэ Эбэ киэргэллээх мааны Маар, түмсүүлээх дьон тоҕуоруспут Түмүк нэһилиэгиттэн — Мария Петрова, сэттэ томтордоох үрдүк мыраан анныгар толуу улахан күөллэрдээх, үүт түгэннээх алаастардаах үтүө дьоннордоох Чуукаартан — Розалия Семенова — биэс Далбар Хотун күрэстэстилэр.
Дьүүллүүр сүбэҕэ “Ньурба куорат” МТ баһылыга, Ньурба куорат аҕалар түмсүүлэрин бэрэссэдээтэлэ Игнатьев Геннадий Васильевич, Ньурба оройуонун тыа хаһаайыстыбатын Департаменын салайааччыта, “Ньурба оройуона” МО тыа хаһаайыстыбатыгар баһылыгы солбуйааччы Ушканов Леонид Владимирович, “Ньурба оройуона” МО Дьиэ кэргэн уонна социальнай боппуруостар отделын специалиһа Александров Павел Михайлович, Ньурбатааҕы культура Департаменын салайааччытын солбуйааччы Михайлова Альбина Ивановна, Ньурба оройуонун Дьахталлар түмсүүлэрин Сэбиэтин салайааччыта, Айар үлэ уонна инновационнай технология киинин дириэктэрэ Ермолаева Альбина Семеновна, Ньурба куорат дьахталларын Сэбиэтин чилиэнэ, Ньурба оройуонун норуот маастара Михайлова Лидия Ивановна, Ньурбатааҕы ускуустуба оскуолатын хореография салаатын учуутала, СӨ ыччат политикатын туйгуна Семенов Михаил Михайлович буолан күрэҕи көрдүлэр.
Балаһыанньа быһыытынан күрэх түөрт түһүмэхтэнэн, тыа дьахтара хотону эрэ манаан олорбокко, саха сатаабатаҕа суох диэбиттии күрэхтэһээччилэр талааннарын толору арыйан, уустаан – ураннаан саҥардан, үрдүк сыанаҕа маанытык таҥнан хаамтаран кэрэ аҥардарбыт ытыс дохсун тыаһа доҕуһуоллаах, толлубакка кыттан бэрт сэргэх күрэс буолла.
Үһүс түһүмэх Далбар Хотуттар астаан аҕалбыт астарын аукционнаан, киирбит харчытын анал байыаннай операцияҕа сылдьар уолаттарбытыгар көмө гынан ыытаары күрэстэстилэр. Чуукаартан сылдьар ыытааччы Андрей Сивцев — Лэкээрин, биэс лоту бэрт түргэнник атыылаан, фондаҕа ыытыллар харчы уопсайа 33 тыһыынча солкуобай буолла. Чуукаартан сылдьар Розалия Семенова минньигэс аһа 23 тыһыынча солкуобайга диэри сыаналанан атыыга барда.
Күрэх түмүгэ тойон сүбэ көрүүтүнэн маннык буолла, «Талба Хотун» — анал аат Чаппандаттан сыльар Валентина Антоноваҕа иҥэрилиннэ, (бирииһи “Ньурба оройуона” МО туруорда), «Хотун Ийэ» — анал аат Маартан Мария Васильеваҕа туттарылынна (бирииһин Бүтүн Аарассыыйатааҕы “Матери России” уопсастыбаннай хамсааһын Ньурбатааҕы салаата туруорда),«Айыы Хотун» — Чуукаартан Семенова Розалия буолла (бирииһин Ньурба куоратын Аҕаларын Сүбэтэ туруорда), «Иэйии Хотун» — анал ааты сүктэ Чаппандаттан Саргылана Семенова (бирииһин Ньурба куоратын дьахталарын Сүбэтэ туруорда), «Мааны Хотун» — анал аат хаһаайката буолла Өҥөлдьөттөн Айталина Андреева (бирииһин Ньурба оройуонун дьахталларын Сүбэтэ туруорда) уонна кылаан кыайыылааҕынан, “Далбар Хотун — 2023”- үрдүк ааты сүгэн “Ньурба оройуона” МО туруорбут 20000 тыһыынчалаах сертификат хаһаайката буолуон буолла — Чаҕыл Чаппандаттан Валентина Антонова.
Тэрийээччилэр Валентина Саввичнаны Дьокуускай куоракка бүтүн өрөспүүбүлүкэтээҕи “Далбар Хотун” күрэскэ баран, Ньурба оройуонун чиэһин ситиһиилээхтик көмүскүө диэн бигэ эрэнэ хааллылар.
