Кэллиэгэлэрбит ситиһиилэрин Саха сирин интернет ситимигэр, хаһыакка булан ааҕар, көрөр – истэр «Кыталык» КД айар үлэтэ бүтүн Өрөспүүбүлүкэҕэ биллэрэ биһиэхэ истэргэ астык уонна үтүө холобур буолар. Ол курдук, хайдахтаах да курус халлаан турдар күн курдук сандааран, үөрэн – мичилийэн киирэн кэлэр, ырыа аргыстаах бииргэ үлэлиир киһибит Светлана Васильева – Музыка Света туһунан култуура үлэтин сырдатар балаһаҕа Өрөспүүбүлүкэтээҕи «Саха сирэ» хаһыат интервью быһыытынан бэрткэ диэн суруйан таһаарбыта биһигини үөртэ.
Ыраах Аллайыаха улууһуттан күөх Ньурбаны дойду оҥостон биһиги Светабыт күн бүгүҥҥэ диэри таһаарыылаахтык үлэлии – хамсыы сылдьар. Ньурба куорат олохтоохторо бу саас буолан ааспыт Светлана уоттаах – күөстээх айар киэһэтин бука диэн сылаастык өйдүүллэрэ буолуо дии саныыбыт. 90-с сыллардааҕы дискотека кэриэтэ кэнсиэр элбэх киһи кутун тутан, бэл диэтэр ыаллыы сытар улуустар истиһэн ыҥыран, Светлана онно баран кэнсиэртээн, араас биэчэрдэргэ ыҥырыылаах тамада буола сырытта. Күннээҕи түбүктэн, үлэттэн ураты биһиги Светабыт истиҥ ийэ, эппиэтинэстээх эбээ оруолун толорон, бириэмэтин сөпкө аттаран, эйэҕэс мичээрдээх үтүө доҕор буолара биһигини үөрдэр.
