Аҕыйах хонуктааҕыта интернет ситимигэр, ППМИ проектарыгар киирэн куоластааҥ диэн биллэрии күүскэ тарҕана сылдьыбытын, бары истэ-билэ сылдьабыт. Ол курдук, бүгүн, балаҕан ыйын 29 күнүгэр «Кыталык» КД улахан саалатыгар куоластааһын түмүгүн таһааран, алта проект кыттыбытыттан үһэ кыайыылаах тахсан, салҕыы Республиканскай күрэххэ кыттар чиэскэ тигистилэр, санатар буоллахха, бу проектар кыайыылаах таҕыстахтарына – толору үбүлэнэн кэлэн, олоххо киирэр кыахтаналлар.
Куораппыт тупсарыгар бэйэлэрин кылааттарын киллэрэн, олорор сирбитин сайыннарыы, тупсарыы өттүгэр күүскэ үлэ ыыта сылдьар дьоммут, проект автордара кэлэн, саалаҕа мустубут дьоҥҥо үлэлэрин көмүскээтилэр: Алексеева Акулина Ивановна «Пионерская 67 нүөмэрдээх дьиэҕэ киирии суолу асфальтааһын», Ирина Ивановна Павлова «Советскай түөлбэҕэ сайыҥҥы водопровод», Давыдов Аммос Прокопьевич «Никииппэр Сэмиэнэп паамытынньыгар С.Васильев аатынан култуура уонна сынньалаҥ пааркатыгар музыкальнай зона», Федотов Руслан Дмитриевич «Западнай түөлбэҕэ сынньанар сир», Бускарова Айталина Тимуровна “Портовской түөлбэҕэ сырдатыы үлэтэ” проектарын толору арыйан, слайда быһыытынан көрдөрөн нэһилиэнньэҕэ сырдаттылар.
Бу алта, барыта да наадалаах, проектартан үһэ интернет ситиминэн куоластааһын быһыытынан кыайда: бастакынан 339 куоластаах — «Никииппэр Сэмиэнэп паамытынньыгар С.Васильев аатынан култуура уонна сынньалаҥ пааркатыгар музыкальнай зона», иккиһинэн – 238 куоластаах «Советскай түөлбэҕэ сайыҥҥы водопровод», үсүһүнэн – 183 куоластаах “Портовской түөлбэҕэ сырдатыы үлэтэ”.
Түмүккэ «Ньурба куорат» МТ баһылыга Игнатьев Геннадий Васильевич куоластааһыҥҥа дьон кыттыыта аҕыйаҕын бэлиэтээтэ, бу кыайбыт проектары, өссө сайыннаран Республиканскай күрэххэ баран ситиһиилэнэн кэлэллэрин баҕарда.
