Күндү, Ньурба оройуонун учууталларын, оҕолорбутун сырдыкка, билиигэ үөрэтэр дьоммутун Н.И.Харитонов-Николай Чуор аатынан «Кыталык» КД коллективын аатыттан Эһигини – Учуутал күнүнэн эҕэрдэлиибит!
Биһиги оҕолорбут улаатан истэхтэрин аайы билиини ыла, уһуйаантан оскуолаҕа киирэн, үөрэхтээх киһи буолан олохторун оҥостоллоругар сүдү кылаат киллэрэр киһинэн – учуутал буолар. Үөрэнээччи үөрэҕи хайдах ылынара учууталтан улахан тутулуктаах, хаачыстыбаннай билиини тулуурдаах, ирдэбиллээх педагог биэрэрэ биллэр суол. Оҕо бу олоххо бэйэтин булунарыгар, ыараххаттары туоруу, бэйэтин дьоһун уонна тус санаатын көмүскүү үөрэнэригэр көмөлөһөр киһи – учуутал.Оскуолаҕа ылбыт билиини сөптөөхтүк иҥэринии үлэтин ыытар киһи – төрөппүт.
Биһиги Ньурбабыт оройуонун учууталларын баай уопуттарын, идэлэригэр кыһамньытын туоһута — үөрэппит оҕотун махтала уонна үрдүк ситиһиитэ буолар.
Эһиги бэриниилээх үлэҕит иһин муҥура суох махтаныбыт уонна киэн туттабыт. Ис сүрэхпититтэн дьолу, доруобуйаны, саҥа ситиһиилэри, махталлаах үөрэнээччилэри баҕарабыт. Үтүө үлэҕит иһин Эһиэхэ барҕа махтал буоллун!
