Аҕам саастаахтар декадаларын чэрчитинэн бүгүн “Кыталык” КД “Ис сүрэхтэн, тапталы кытта” ытык кырдьаҕастарбытыгар бырааһынньыктааҕы биэчэр буолла. Халлаан төһө да, хаардаах самыыр түстэр “Кыталык” сылаас, сырдык фойетыгар аҕам саастаахтар тоҕуоруһа муһуннулар.
Бырааһынньыктааҕы бырагыраамманан күнүс икки чаастан остуол оонньууларыгар “хамылык-хаамыксаҕа” уонна сыалы таба быраҕыыга — Дартска баҕалаах дьоҥҥо күрэх буолла.
Тэрээһин үөрүүлээх чааһа күнүс үс чаастан саҕаланна. Кырдьаҕастары эҕэрдэлээтилэр “Ньурба оройуона” МО баһылыгын социальнай боппуруостарга солбуйааччы — Петрова Наталья Семеновна, “Ньурба куорат” МТ баһылыгын солбуйааччы Куличкина Мария Константиновна уонна Ньурба оройуонун бэтэрээннэрин Сэбиэтин бэрэссэдээтэлэ Олесова Татьяна Прокопьевна. Түгэнинэн туһанан түөлбэ олоҕор актыыбынай кыттыыны ылар дьоннорго бочуотунан грамота улуус уонна куорат ааттыттан туттартаатылар.
Кэнсиэртинэй бырагырааммаҕа ыҥырыыны ылынан кэлэн эҕэрдэлээтилэр Ньурба дьахталларын түмсүүтүн аатыттан үҥкүү бөлөҕө, кырачаан “Сир симэхтэрэ” үҥкүү бөлөҕүн үҥкүүһүттэрэ, Егор Михайлов уонна “Кыталык” КД ырыаһыттара.
Биир үөрүүлээх түгэнинэн эдэр ыччат, Ньурбатааҕы техническай колледж устудьуоннара кэлэн, бэйэлэрин илиилэринэн оҥорбут өйдөбүнньүк эҕэрдэ суруктарын аҕам саастаахтарга туттартаабыттара уонна бытаан үҥкүүгэ ыҥыран, сааланы эргийэ үҥкүүлэппиттэрэ көрүөххэ астык көстүү буолан ылла.
Сандалы тула олорон сэһэргэһии бириэмитигэр кэлбит ыалдьыттартан дефиле — конкурс “Дело в шляпе” мустубут дьон интириэһин күүскэ тарта. Барыта уопсайа бу күрэххэ бэлэмнэнэн кэлэн уон сэттэ кэрэ аҥар кыттыыны ылла. Дьүүллүүр сүбэҕэ Ньурба оройуонун бэтэрээннэрин Сэбиэтин бэрэссэдээтэлэ Татьяна Прокопьевна Олесова, “Кыталык” КД уус -уран салайааччыта Айаана Антонова уонна “Кыталык” КД исписийэлииһэ Альбина Степановна Тумусова буолан көрдүлэр.
Бииртэн биир кэрэ сэлээппэлэри судьуйалааннар түмүк маннык буолла — “Саамай оригинальнай сэлээппэ” анал аат хаһаайкатынан буолла Лазарева Розалия Ильинична, “Саамай улаха сэлээппэ” анал ааты ылла — Семенова Надежда Васильевна уонна “Саамай симэммит сэлээппэ” анал ааты бүгүн сүктэ Розалия Дмитириевна Петрова. Кыттыыны ылбыт кэрэ аҥардар бары туоһу сурук туттулар.
Күрэх манан эрэ бүппэккэ, тиһигин быспакка, түмсүү тухары буолла, ол курдук аҕам саастаах дьоннорбут араас оонньууларга оонньоон, бириис бөҕө ылан үөрдүлэр — көттүлэр.
Киэһэлик күнүс буолбут мини — спартакиада түмүгүн биллэрдилэр, ол курдук “ хабылык — хаамыска” остуол оонньуутугар алта уонтан үөһээ саастаах дьахталларга үһүс миэстэни ылла Павлова Анна Васильевна, иккиһи ылла Егорова Анастасия Петровна, бастакы миэстэни ылла Афанасьева Аграфена Александровна. Бу көрүҥҥэ эр дьон түмүгэ — үһүс миэстэни ылл Егоров Виктор Николаевич, иккискэ таҕыста Максимов Святослав Степанович, бастакы миэстэни ылла Степанов Валерий Гаврильевич.
Кэлиҥҥи спартакиадаларга дьон “Дартс” оонньууну сөбүлээн кыттар буолла. Бу да сырыыга бу көрүҥҥэ кыттааччы элбэх буолан биэрдэ. Төһөнөн элбэх киһи кыттар да, күрэх соччонон тыҥааһыннаах буоларын бары билэбит. Ордук элбэх кыттааччы кэрэ аҥардар ортолоругар буолла — уопсайа уон үс киһи кыттыбытыттан үһүс бочуоттаах миэстэни ылла Саввинова Аида Дмитриевна, иккиһи ылла Дмитриева Матрена Егоровна, бастакы миэстэни отут икки очко хомуйан ылла Петрова Розалия Дмитириевна. Эр дьон ортолоругар сэттэ кыттааччы холоммутуттан үһүс миэстэни ылла Егоров Виктор Николаевич, иккиһи ылла Степанов Валерий Гаврильевич, бастакы миэстэни ылла Максимов Святослав Степанович.
Бүгүҥҥү тэрээһин үҥкүүлэрин баяҥҥа доҕуһуоллаан үҥкүүлэттэ, “Кыталык” КД култуура бэтэрээнэ, аккомпаниатор — Тимофей Шестаков. Кэлбит ыалдьыттар ирэ- хоро кэпсэтэн, чэйдээн, уруккун-хойуккуну ахтыһан бэрткэ сынньанан, күрэхтэргэ кыттыбыттара илии тутуурдаах, өттүк харалаах бардылар. Үөрүүлээх биэчэр оһуокайынан түмүктэннэ.
