Сэтинньи ый 11 күнүгэр Ньурба оройуонун спорда уонна культурата сайдарыгар өссө биир олук уурулунна. “Кыталык” КД улахан саалатыгар “Авокадо” оҕону сайыннарар киин икки сыллаах үлэтин отчуоттуур кэнсиэрэ буолла. Бу киин туһунан сиһилии билиһиннэрэр буоллахха, 2021 сыллаахха, сэтинньи 20 күнүгэр Октябрьскай нэһилиэк “Ромашка” оҕо уһуйаанын хореограф үлэһитэ, Александрова Мария Алексеевна куорат оҕолорун гимнастика кэрэ эйгэтигэр уһуйаары бастакы уруогун биэрбитэ. Ньурбаҕа суох саҥа сүүрээн тэриллэн эрэрин истэн, кыыс оҕолоох төрөппүттэр биллэрии тахсаатын кытта тута суруттараннар үлэ күөстүү оргуйбута.
Бүгүҥҥү күҥҥэ бу сыантырга үс сааһыттан уон сааһыгар диэри 110 кырачаан гимнастка сылдьар. Мария Алексеевна самозанятай буолан, оҕолору Бизнес инкубаторга, ону таһынан инникитин кэскиллээх тренери оройуон уонна Октябрьскай нэһилиэк дьаһалталара өйөөннөр А.И.Пахомов аатынан спорт саалатыгар дьарыктыыр.
Кырачаан гимнасткалар долгутуулаах, сыанаҕа бастакы тахсалларыгар бэлэмнэнэ сылдьар кэмнэригэр кэнсиэр саҕаланыан иннинэ фойеҕа «Авокадо » оҕолорун ситиһиилэрин быыстапката буолла. Кылгас кэм иһигэр оройуон, Өрөспүүбүлүкэ, Арассыыйа таһымыгар араас кыайыыларын дакаастабыллара – грамоталар, кубоктар, мэтээллэр, кэлбит көрөөччүнү элбэҕинэн уонна үксэ бастакы миэстэтинэн сөхтөрдө. Авокадолар бэйэлэрэ улахан ситиһиилэринэн Новосибирскай куоракка ыытыллыбыт, Юлия Канаева гимнастика Бүтүн Арассыыйатааҕы турнирыгар «Алмазики» бөлөх 1 миэстэни ылбытын чорботоллор.
Кэнсиэр кыыс оҕо сөбүлээн оонньуур Барби куукулатын тиэмэтин таарыйан буолла. 20 нүөмэр тухары, гимнастика уонна араас хайысхалаах нүөмэрдэртэн турар икки сыллаах үлэ түмүгэр, оҕолор эппиэтинэстээхтик, төрөппүттэр кыһамньылаахтык сыһыаннаспыттара тута харахха быраҕыллар. Хас нүөмэр аайы дьэрэкээн тигиилээх таҥастар, турбут үҥкүүлэр көннөрү үҥкүү буолбакка, бары кэриэтэ гимнастикаттан хамсаныы элеменнэрэ киирбиттэрэ көрөөччү кутун тутуон тутта.
Нүөмэрдэр быыһыгар Барби уонна Кен уобараһын сүкпүт ыытааччылар көрөөччүлэртэн оҕолору сыанаҕа ыҥыран, араас моһоллору туораттылар, кыайбыттарга бу «Авокадо» оҕону сайыннарар кииҥҥэ биир ый босхо сылдьар абонемены туттардылар.
Кырачаан Авокадо иитиллээччилэрэ бастаан долгуйар курдук туттар бэйэлэрэ, сыанаҕа тахса, көрөөччүгэ үөрэнэ таарыйа бу кэнсиэргэ кыттыыны ылбыттара, инникитин араас таһымнаах күрэхтэргэ кыайыы көтөллөнөллөрүгэр төһүү күүс буолуо дии саныыбыт.
Бу буолбут кэнсиэр «Авокадо» оҕону сайыннарар киин иккис улахан тэрээһиннэрэ буолар, бастакы улахан, гимнастикаҕа аһаҕас турнир муус устар ый 2 күнүгэр ыытыллыбыта. Оҕо төһөнөн онно – манна харса суох кыттан истэҕинэ эрэ сайдарын билэн, опыттаах тренер Мария Алексеевна иитиллээччилэрин араас күрэхтэргэ кытыннарар. Бу маны төрөппүт өйдөөн, өйөөн, тренердэрин саҕалааһыннарын барытын тэҥҥэ ылсан, төрөппүттэр оҕолорун сайдыытыгар бэйэлэрин сүдү кылааттарын киллэрэллэр.
Үөрүүлээх быһыыга майгыга эҕэрдэ тыллары эттилэр «Ньурба оройуона» МО баһылыгын солбуйааччы Н.С.Петрова, Ньурба оройуонун спортка уонна физическай культураҕа управлениетын начальнига Р.А.Алексеев, Октябрьскай нэһилиэк баһылыгын солбуйааччыта А.М.Иванова, төрөппүттэр ааттарыттан тыл эттэ М.Е.Захарова. Сыл түмүгүнэн үчүгэй көрдөрүүлээх оҕолорго грамоталар туттарылыннылар.
Бу дьоро киэһэни бэлэхтээбит тренергэ Мария Алексеевнаҕа Ньурба оройуонун уонна Октябрьскай нэһилиэк баһылыктарын ааттарыттан Бочуоттаах грамоталар туттарылыннылар.
Спорт бу сэдэх көрүҥэ оҕо сайдарыгар төрөппүттэн улахан тутулуктаах: элбэх сыраны, ону таһынан баһаам үбү эрэйэр, маны барытын өйдөөн туран, эппиэтинэстээхтик сыһыаннаһар, куруук сүбэ – ама, күүс буолар төрөппүттэригэр Мария Алексеевна «Авокадо» оҕону сайыннарар киин аатыттан махтал сурук туттартаата.
Түгэнинэн туһанан бу дьэрэкээн, оҕолуу ыраас эйгэлээх кэнсиэр тэрээһинигэр сүүрбүт –көппүт төрөппүттэргэ чуолаан Потапова Евдокия Викторовнаҕа, Сивцев Трофим Евсеевичка, Анна Акимовна, Николай Владимирович Сотниковтарга Мария Алексеевна улахан махталын тиэрдэрин биллэрдэ.
Араас дьэрэкээн көстүүмнээх кыргыттар, гимнасткалар сыанаҕа тутта- хапта сылдьалларын киһи көрөн — Ньурбабыт спорда кэскиллээх эбит диэн санааҕа кэлэр.
Аны түөрт, 2027 сылга Ньурба оройуона Өрөспүүбүлүкэ таһымыгар сүдү улахан күрэхтэһиини – Саха сирин норуоттарын тохсус оонньууларын ыытаарыгар, бу бүгүн кыттыбыт оҕолор тэрээһин аһыллыытыгар кыттан, бэйэлэрин ситиһиилэрин көрдөрүөхтэрэ диэн эрэнэбит.
