Бүгүн, сэтинньи ый 15 күнүгэр, “Кыталык” КД хараҕынан көрбөттөр уонна мөлтөхтүк көрөр уопсастыба Бүтүн Аан дойдутааҕы көрбөттөр “Үрүҥ торуоска” акция чэрчитинэн ый иһигэр оройуоҥҥа ыытыллыбыт түмүктүүр тэрээһиннэрэ буолла.
Бу акция үлэтин сүрүн сыалынан буолар, оройуон иһигэр олорор харахтарынан көрбөт уонна мөлтөхтүк көрөр дьон тыаттан киирэллэригэр- тахсалларыгар оросхуотурбакка эрэ, миэстэтигэр тиийэн, ханнык эмп-томп тиийбэтин, күннээҕи олохторугар туох кыһалҕаны көрсөллөрүн быһаарсыы үлэтин ыытыы. Ол курдук биир ый устата, суол иис тириэрдибэт эрэ нэһилиэктэриттэн ураты, туох баар тыалары хабан туран оробуочай бөлөх кэрийэ сылдьан, харахтарынан көрбөт уонна мөлтөхтүк көрөр дьону кытта үлэлэстилэр.
Нэһилиэктэри кэрийии түмүгэр харахтарынан инбэлиит дьоннор үксүн санаторно-курортнай эмтэнии, онно кэлии-барыы бырайыаһын уйунуу, реабилитация, босхо эмп-томп, инбэлиит дьону үөрэхтээһин, адреснай матераильнай көмөнү оҥоруу боппуруостара сытыытык турарын иһитиннэрдилэр.
Бүгүҥҥү үөрүүлээх тэрээһиҥҥэ эҕэрдэ тылы эттилэр « Ньурба оройуона» МО баһылыгын солбуйааччы Петрова Н.С., Ньурба оройуонун Бүтүн Арассыыйатааҕы көрбөттөр уопсастыбаларын Ньурбатааҕы отделын бэрэссэдээтэлэ Яковлева С.С., ыйдааҕы үлэ түмүгүн билиһиннэрдэ Дьиэ кэргэн уонна социальнай отдел специалиһа Никифорова А.В. Маны таһынан сыл түмүгүнэн уопсастыба иһинэн ыытыллыбыт тэрээһиннэргэ көхтөөх кыттыыны ылбыт чилиэттэргэ бочуотунанай грамоталар туттарыллынар.
Фойеҕа уопсастыба чилиэттэрин быыстапката турда, манна бааллар араас сэдэх дьарыктаах кэрэ аҥардар муспут ручка, луоска, оҕуруонан оҥоһуктар, кырадаһынынан тигии сыттык хаалара уо.д.а..
Салҕыы иккис саалаҕа кэлбит дьон куорат араас исписийэлиистэриттэн туһааннаах боппуруостарын ыйыттылар, сүбэлэттилэр. Ньурбатааҕы олох – дьаһах коммунальнай хаһаайыстыбатын бухгаалтыра, бэйэтин ис санаатыттан кэлэн остуол оонньуутугар хабылык – хаамыскаҕа маастар-кылаас биэрдэ.
Бүгүн харахтарынан көрбөт уонна мөлтөхтүк көрөр дьон Бүтүн Аан дойдутааҕы көрбөттөр “Үрүҥ торуоска” акция түмүктүүр тэрээһинигэр кэлэн кыттыыны ылан, көрсүһэн ирэ – хоро кэпсэтэн, санаа үллэстэн күннээҕи түбүктэн аралдьыйан астынан бардылар.
