Бэҕэһээ, сэтинньи ый 28 күнүгэр, нэдиэлэ саҕаланыытын аахсыбакка, «Кыталык» КД амарах санаалаах куорат олохтоохторо көрөөччү саалатын толору мустан, Ньурба оройуонун эдэр ийэлэрин кэрэчээн бэйэлээх кыыс оҕолорун кытта, оройуоҥҥа ийэ декадатын түмүктүүр «Дочки-матери» күрэххэ мустан, алта түһүмэх тухары бэйэлэрин сатабылларын көрдөрөн күөн күрэстэһэн холонон көрдүлэр.
Бу улахан күрэх, көннөрү тэрээһин курдук ааспакка, ыраах, Соҕуруу Кореяҕа ыарахан ыарыыттан эмтэнэ сытар биир дойдулаахтарбытыгар : Иванова Ольга Владимировнаҕа, Афанасьева Айталина Федоровнаҕа, Евсеев Сергей Ивановичка көмө акция быһыытынан ыытылынна. Тэрийээччилэринэн биир сомоҕо буолан үлэлээтибит “Ньурба оройуона” МО, Ньурба оройуонугар Арассыыйа ийэлэрин общественнай хамсааһына уонна Н.И.Харитонов- Николай Чуор аатынан “Кыталык” КД үлэһиттэрэ.
Күрэххэ араас нэһилиэктэртэн барыта биэс дьиэ кэргэн кыттыыны ылла. Сорохтор сыанаҕа бастакы холонуулара буолан, долгуйан да ылыылар баар этилэр. Кыттааччылары кытта билиһиннэрэр буоллахха, бастакынан Олесова Светлана Васильевна кыыһа Чэмэлиинэлиин Ньурба куораттан, иккиһинэн Мостахова Мария Владимировна кыыһа Эльзалыын Таркаайыттан, үсүһүнэн Макарова Галина Дмитриевна кыыһа Викториялыын Хаҥаластан, төрдүһүнэн Николаева Юлия Сергеевна кыыһа Леналыын Октябрьскайтан уонна бэсиһинэн Яковлева Мария Александровна кыыһа Камелиялыын Маар нэһилиэктэриттэн кыттыыны ыллылар.
Сонун күрэҕи Михаил Кутана көмөлөһөөччүлээх Аэлита Дьячковская кыыһа Миленалыын ыыппыттара уратытык көһүннэ. Көхтөөх дьиэ кэргэн тас сэбэлэрэ кыраһыабайдарын ааһан, ыллыыр, үҥкүүлүүр да, ыытааччы да быһыытынан барытыгар дэгиттэрдэрин көрдөрөн соһуттулар.
Хайа баҕарар күрэх дьүүллүүр сүбэлээҕин билэбит, ол курдук тойон сүбэ бэрэссэдээтэлинэн үлэлээтэ Ушканов Леонид Владимирович, «Ньурба оройуона» МО аҕа баһылыгын тыа хаһаайыстыбаҕа солбуйааччыта, Ньурба оройуонун тыа хаһаайыстыбатын Департаменын салайааччыта, Необутов Павел Семенович, “Ньурба куорат” МТ баһылыгын солбуйааччыта, Николаев Илья Николаевич, Ньурбатааҕы оҕо искусствотун оскуолатын салайааччыта, Ермолаева Альбина Семеновна, Ньурба оройуонун дьахталлар Сэбиэтэрин бэрэссэдээтэлэ, Дмитриева Анна Александровна, Ньурба куоратын дьахталларын Сэбиэттэрин бэрэссэдээтэлэ буолан күүстээх үлэни көрүстүлэр.
Бастакы уонна кытааччыларга саамай долгутуулааҕынан бэйэни билиһиннэрии түһүмэҕэ ыытыллынна, манна кыргыттар кимтэн кииннээхтэрин, хантан хааннаахтарын билиһиннэрэн бэйэлэрин кытта көрөөччүлэргэ уонна тойон сүбэҕэ көһүннүлэр.
Иккис, биир оччо долгутуулаах уонна кыттааччылары толору арыйар түһүмэҕинэн талаан көрүүтэ буолла. Манна ким ыллыыр ыллаан, ким үҥкүүлүүр үҥкүүлээн дьиэрэттэ. Эдэр оҕолор саха төрүт инструменын — кырыымпаны толору баһылаабыттара көрөөччүлэри сөхтөрдө.
Сонун түһүмэхтэринэн ийэлэр сатабыллара уонна баар астан тутатына биир бүлүүдэ астаан көрдөрбүттэрэ буолар. Бэриллибит тэттик бириэмэ иһигэр кэрэчээн бэйэлээх ийэлэр баар материалтан кырачаан кыргыттарыгар таҥас оҥоро охсон, кыргыттара ытыс дохсун тыаһыгар сууланнылар. Тутатына астаабыт астарын тойон сүбэ амсайан, түмүк таһааралларыгар кытааччыларга кыайыыга дьулуһарга баал эбэттээтэ.
Бэһис түһүмэҕинэн оҕо чөл олоҕу тутуһарыгар сөптөөх иитиини ыытар спорт түһүмэҕэ буолла. Дьиэ кэргэттэр бары да бэрт имигэстик сыанаҕа тахсан фитнестаан көрөөччүлэри үөртүлэр.
Алтыс, долгутуулаах, туох баар кэрэ аҥардар күрэхтэрин түмүктүүр киэһээҥҥи мааны таҥастаах дефиле буолла. Оҥостон, туттан-хаптан тахсыбыт ийэлээх кыргыттар, сырдык сыана устун аа-дьуо хааманнар дохсун ытыс тыаһын ыллылар. Эчи таҥастара кэрэтин, долгуйбуттара ааһан сыанаҕа холкутун туттан долгуннура уһуннулар.
Тойон сүбэ үлэлиир кэмигэр Ньурба куораттыттан, нэһилиэктэртэн ылбаҕай ырыаһыттар тахсан ыллаан көрөөччүлэри саататтылар. Күрэх соһуччу сулуһунан буолан ылла, биир дойдулаахпыт, Бордоҥ нэһилиэгэ тумус туттар уола, үс ырыатын бэлэх ууммут виртуоз хомусчут — Айсен Аммосов.
Кыттааччылар бары да кэрэлэрэ, талааннаахтара, сатабыллаахтара дьүүллүүр сүбэ үлэтин уустугуртулар диэххэ сөп. Сыанаҕа бииртэн — биир кэрэ, нэһилиэгин чиэһин көмүскүүр, общественнай үлэҕэ көхтөөх кыттыын ылар дьиэ кэргэн бу киэһэ бэйэтин тургутан көрдө.
Кыттааччыларга түөлбэлэрин, түмсүүлэрин, аймахтарын, доҕотторун ааттарыттан эҕэрдэ истиҥ тыллара этилиннилэр.
Түмүк биллэрин бары да долгуйэ, эрэнэ кэтэспит ыалдьааччыларга тойон сүбэ тахсан маннык быһаарыныы ылбыттарын иһитиннэрдэ: оройуоннааҕы «Дочки-матери» күрэх «Самая креативная мама и дочь» анал ааты ыллылар Хаҥаластан Макарова Галина кыыһа Викториялыын, «Самая искусная мама и дочь» ааты ыллылар Таркаайыттан Мостахова Мария кыыһа Эльзалыын, «Самая талантливая мама и дочь» анал ааты ылыан ыллылар Октябрьскайтан Николаева Юлия кыыһа Леналыын, «Самая спортивная мама и дочь» анал ааты ыллылар Ньурба куораттан Олесова Светлана кыыһа Чэмэлиинэлиин уонна күрэх бастыҥнара буоллан «Супер мама и дочь» үрдүк ааты сүктүлэр Маартан сылдьар эргиччи талааннаах Оппудонова Мария кыыһынаан Камелиялыын.
Хайа баҕарар күрэх өйөбүллээх эрэ буоллаҕына үрдүк таһымҥа ыытылларын бары билэбит, ол курдук бу улахан, оройуоҥҥа ыытыллыбыт күрэх хайаатар да күүстээх өйөбүлү ирдиирин билэн туран киэн тутта ааттыыбыт тэрээһин инниттэн тэҥҥэ сүүрсэн-көтүһэн кыттыбыт, тэрийээччилэри өйөөбүт социальнай партнердарбытын — «Хартыына» фотостудияны, «Северина» шуба атыылыыр салону, «EgoFIT» тренажернай сааланы, «ImaFit» фитнес сааланы уонна күрэҕи өйөөбүт спонсордары – “Бохо” таҥас маҕаһыынын, “LOOKBOOK” таҥас маҕаһыыны, Алена Ким кэрэ буолуу салонун, «Фоторум» студияны, “FoodBuket” минньигэс сибэкки оҥорор студияны, «Цветы» маҕаһыыны, кондитер Агата Пайдютованы, “Мастера вкуса” кулинарияны.
Хас ыытар тэрээһиннэрбитигэр саҥаттан – саҥа спонсордар туора турбакка көмөлөһөн иһэллэрэ биһиги үлэбитин эбии кынаттыыр. Атахтарыгар тура да илик, эдэр, саҥа саҕалаан эрэр урбаанньыттар бу тэрээһиҥҥэ күүс-көмө буолбуттара үөрүүбүтүн үксэтэр. Түгэнинэн туһанан бу оройуон таһымыгар ыытыллыбыт, ийэлэр күннэрин бэлиэтиир, декаданы түмүктүүр, ыраах Соҕуруу Кореяҕа ыарахан ырыыттан эмтэнэ сылдьар биир дойдулаахтарбытыгар көмө буолан ыытыллыбыт акция – күрэскэ туора турбакка көмө буолбуккутугар тэрийээччилэр ааттарыттан барҕа махталбытын тиэрдэбит! Баҕарабыт үлэҕитигэр үрдүк ситиһиилэри, сырдык аартыктар арылла туралларын, дьиэ кэргэҥҥитигэр, тус олоххутугар табыллыыны!
Бу дьоро киэһэҕэ биир дойдулаахтарбытыгар көмө быһыытынан, буолбут күрэскэ атыыламмыт билиэтинэн барыта 113000 (сүүс уон үс тыһыынча) киирдэ.
Манан аһымал акциябыт бүппэт, барыгытын, Ньурба куорат олохтоохторун, ытык- мааны ыалдьыттарын аны бу суббуотаҕа, ол эбэтэр ахсынньы ый 2 күнүгэр, бүтүн Ньурба оройуонун нэһилиэктэрин талааннаахтара кыттыылаах «Итэҕэй уонна эрэн» аһымал Ольга Владимировнабытыгар, Айталинкабытыгар уонна Сергей Ивановичка көмө буолар кэнсиэркэ күүтэбит!
