Бүгүн, сэтинньи ый 30 күнүгэр, «Кыталык» КД Ньурба оройуонугар тыа хаһаайыстыбатын күнүн бэлиэтиир улахан тэрээһин ыытылынна. Сарсыарда 10 чаастан оройуоҥҥа үлэлии – хамсыы сылдьар тыа хаһаайыстыбатын бородууксуйатын оҥорон таһаарар тэрилтэлэр, кэтэх бааһынай хаһаайыстыбалар уонна биирдиилээн дьон чааһынай бородууксуйаларын атыы – эргиэн “Идэһэ – 2023” дьаарбанката буолла. Куорат олохтоохторо сылын ахсын күүтэр, кыһыҥҥы хаһаастарын булунар үтүө үгэскэ кубулуйбут дьаарбаҥкалара ыытыллара номну хаһыс да сылыгар барда. Сүөһүтэ- сылгыта суох куорат олохтоохторо, удамыр сыанаҕа киилэнэн да, атаҕынан да кыһыны туоруур эттэрин хаһааналаарыгар үчүгэй түгэн тосхойдо.
Күнүс 11 чаастан аччыгый саалаҕа “Булт төрүт дьарыкпыт” оройуоннаҕы СӨ тыатын хаһаайыстыбатын бочуоттаах үлэһитэ, Үөдэй нэһилиэгин бочуоттаах олохтооҕо, “Сахабулт” концерн Ньурбатааҕы филиалын салайааччыта Семенов Валерий Никитич сырдык аатыгар аналлаах быыстапка- дьаарбаҥка буолла. Манна Ньурба куоратыттан уонна оройуон уон биир нэһилиэгэ кыттыыны ылла. Күрэх биэс анал ааттарга — булт уонна булт тэриллэрэ, кыыллар, көтөрдөр чуучалалара, декоративнай оҥоһуктар, тирии уонна түүлээхтэн оҥоһуктар, саха төрүт аһа, булчут , балыксыт таҥаһа-саба, туттар тэрилэ хайысхаларга наарданан ыытылынна.
Тойон сүбэҕэ үлэлээтилэр: Дьарыктаах буолуу киинин сүрүн инспектора – Яковлева Оксана Михайловна, “Булт төрүт дьарыкпыт ”бырайыак ааптара, Дьарыктаах буолуу киинин бочуоттаах үлэһитэ, Ньурба куорат, Чаппанда нэһилиэгин бочуоттаах олохтооҕо – Николаева Татьяна Дмитриевна, Ньурба экологиятын государственнай комитетын инспектора – Духов Виталий Валерианович, Ньурба түмэлин исписийэлииһэ – Ефимов Алексей Николаевич, Дьокуускайдааҕы 5 –с нүөмэрдээх оскуола директорын солбуйааччыта – Семенов Петр Васильевич буолан бүгүҥҥү күрэх кыттыылаахтарын көрдүлэр.
Сонун уонна эдэр ыччаты иитэр сыаллаах тэрээһиҥҥэ эҕэрдэ тылы эттилэр “Ньурба оройуона” МО баһылыгын солбуйааччыта Петрова Наталья Семеновна, “Булт төрүт дьарыкпыт” бырайыак ааптара Николаева Татьяна Дмитриевна уонна Дьокуускайдааҕы 5 – с нүөмэрдээх оскуола директорын солбуйааччыта, Семенов Валерий Никитич уола – Семенов Петр Валерьевич.
Уол оҕо айылҕаттан бултка тардыстар айдарыылаах, кинини кыра эрдэҕиттэн тыаҕа илдьэ сырыттахха, өбүгэлэрбит үгэстэрин батыһыннаран, булт сиэрин-туомун үөрэтэххэ үтүө булчут, балыксыт буола улаатар. Ол курдук, бүгүҥҥү быыстапка -дьаарбаҥка күрэҕин кыттыылаахтара, уопуттаах булчуттар куорат оскуолаларын оҕолоругар, бэрт үчүгэйдик быһааран, ыйан- кэрдэн, туттаран, көрдөрөн кэпсээтилэр.
Ол курдук, Маалыкайтан Тихонов Николай Анатольевич — тыатааҕыны хайдах бултууру- алтыыры, Үөдэйтэн Григорьев Прокопий Семенович тайах бултааһынын туһунан, Үөдэйтэн Аммосов Айаал Николаевич кииһи бултааһыны, Дьаархантан Григорьев Семен Русланович куһу бултааһыны, Хорулаттан Федоров Алексей Николаевич тайаҕы бултааһын туһунан кэпсээтилэр.
Телефон, комьютер эйгэтигэр улааппыт оҕолор, бу бүгүҥҥү уопуттаах булчуттар кэпсээннэрин олус интириэһиргээн туран иһиттилэр, билбэт боппуруостарын тутатына ыйытан хоруйдары ыллылар. Үчүгэйэ диэн, экспонаттары оҕолорго туттаран, хайдах туттулларын ыйан-кэрдэн биэрбиттэрэ — уолаттар болҕомтолорун күүскэ тарта. Булчуттар оҕолорго кэпсииллэрин аныгы үйэ бассаап ситимигэр көрөн, ыаллыы сытар Сунтаар улууһуттан интириэһиргээбиттэрэ, бу бырайыак улахан хамсааһыҥҥа кубулуйуон сөбүн туоһулуур.
Бу улахан тэрээһиҥҥэ күүс-көмө буолбут спонсордарга «Ньурба оройуона» МО администрациятыгар, Ньурба оройуонун аҕалар түмсүүлэригэр, “Ньурба куорат” МТ администрациятыгар, Ньурбатааҕы РосГвардия кэллэктиибигэр, Ньурбатааҕы тыа хаһаайыстыба Департаменыгар, Спорт уонна физическай культура Управлениетыгар, “Байар” СПХ-га, Бордоҥ нэһилиэгин администрациятыгар, Ньурба оройуонун дьарыктаах буолуу киинигэр, Ньурбатааҕы ыччат политикатын Управлениетыгар, улуустааҕы үөрэҕирии Управлениетыгар, Ньурба куорат дьахталларын Сэбиэтигэр, Ньурбатааҕы экология государственнай комитетыгар, Ньурбатааҕы култуура департаменыгар, Үөдэй нэһилиэгин администрациятыгар, Прокопий Прокопьевич уонна Анна Николаевна Тихоновтарга, Татьяна Дмитириевна Николаевалыын бииргэ үлэлии сылдьыбыт экс-главаларга уонна Семенов Валерий Никитич аймахтарыгар, саха төрүт дьарыга – бултааһын ситимин быспат туһугар хамсаныыны өйөөбүккүтүгэр, тэрийээччилэр ааттарыттан барҕа махталы тиэрдэбит.
Күнүс 15 чаастан улахан саалаҕа бырааһынньыктааҕы тэрээһин буолла. Эҕэрдэ тылы эттилэр Ушканов Леонид Владимирович, «Ньурба оройуона» МО аҕа баһылыгын тыа хаһаайыстыбаҕа солбуйааччыта, Ньурба оройуонун тыа хаһаайыстыбатын Департаменын салайааччыта, Михайлова Нюргуяна Михайловна, “Ньурба оройуона” МО депутаттарын Сэбиэтин бэрэссэдээтэлэ, Необутов Павел Семенович, “Ньурба куорат” МТ баһылыгын солбуйааччыта.
Эппиэтинэстээх, элбэх сыраны ирдиир, өрөбүл күнүн, бырааһынньыгы аахсыбакка тыа хаһаайыстыбатын эйгэтигэр үлэлии-хамсыы сылдьар чулуу үлэһиттэргэ махтал суруктар, бочуотунай грамоталар, наҕараадалар туттарылыннылар.
Түгэнинэн туһанан, биһиги бииргэ үлэлиир кэллиэгэбит, ырыанан эрэ муҥурдаммакка, эр киһи быһыытынан “булт” — диэн баран муннука ытаабыт киһибитин, Максим Иванович Федоровы-Ырыа Махсыымы бүгүҥҥү оройуоннааҕы “Булт төрүт дьарыкпыт” быыстапка-дьаарбаҥкаҕа көхтөөхтүк кыттан Үөдэй салалтата туруорбут анал бирииһин — 10 сууммалаах сертификаты ылбытынан итиитик- истиҥник эҕэрдэлиибит!
