Сыл түмүгэр араас тэрээһиннэр «Кыталык» КД быыстала суох ыытыллаллар. Олортон биир бастыҥнара уонна кэтэһиилээхтэрэ – Ыччат баала буолар. Сыл – хонук аастаҕын аайы бу ыытыллар баал тэрийээччилэрэ да, кыттааччылара да уларыйан иһэр. Урукку ыччат лидердара бүгүн ыҥырыылаах ыалдьыт буолан, эдэр оҕолорго уопут атастаһан, сүбэ-ама буоллулар.
Бүгүн, ахсынньы ый 25 күнүгэр, «Кыталык» КД Ньурба оройуонун чулуу эдэр ыччата, ыраахтан – чугастан тоҕуоруһа муһунна. Тэрийээччилэр хас да хонук инниттэн сүүрэн- көтөн, бэлэмнэнэн, бүгүн үчүгэй көрдөрүүлээх баал кыттыылаахтарын бэлиэтээһинэ буолла.
Ньурба оройуонугар 6300 ыччат саастаах дьон баара биллэр, ол эбэтэр оройуоммут олохтоохторуттан сыалай 30 % буолар. Нэһилиэктэринэн, куоратынан барыта уон сэттэ ыччаты кытта үлэлиир исписийэлиис баар. Бу үлэһиттэр бүтүн оройуон эдэр дьонун хамсатан, түмэн үлэлии сылдьаллар. Кинилэр араас хабааннаах тэрээһиннэри, акциялары ыыталлар, олортон чопчу бэлиэтээн ааһыахха наада бу күһүн буолбут «Корзина добра» диэн аҕам саастаахтар декадаларын чэрчитинэн кырдьаҕас дьоҥҥо эмп- том, күннээҕи аһылыктарын атыылаһан биэрэр акцияны, ону таһынан аҕам саастаах дьоҥҥо сөбүлээн ааҕар оройуон хаһыатыгар бэлэх уунан сурутууну.
Урукку сылларга тимуровскай хамаандалар баалларын бары диэн бэрткэ билэр буолуохтааххыт, билиҥҥи үйэҕэ оннук сыаллаах хамаандалар “волонтер” диэн ааттананнар, күн бүгүн үлэлии-хамсыы сылдьаллар. Быйыл ыччат отделыгар барыта 1200 сайаапка киирбититтэн, 550 анал байыаннай операцияҕа кытта сылдьар уолаттарбыт дьиэ кэргэттэриттэн уу-хаар, мас хайытааһыныгар көмө көрдөөн киирбит эбит. Оройуон үрдүнэн официально 350 волонтер Добро.ру үтүө дьыала платформатыгар регистрация ааһан тимуровскай хамсааһыҥҥа киирэн көмөлөһө сылдьаллар.
Бүгүҥҥү ыччаппыт соҕуруу араас форумнарга, семинардарга кыттыыны ылан баалларын биллэрэллэр, ол курдук Ньурба оройуонун ыччат имиджевай политикатын управлениетын информационнай салаата Нюрба – Live ютуб канал үлэлэтэн быйылгы сылга 120 видеопроект оҥорон таһаарбытыттан, 60 социальнай хабааннаах роликтар буолаллар, ону таһынан быһа эфирдэри, оройуоҥҥа ыытыллар афишалары оҥорон тарҕаталлар.
Бу кыһын сэтинньи ыйтан Ньурба оройуонугар араас проектары таһаарарга мунаарар боппуруостарга сүбэ-ама, толору арыаллаан араас граннарга кыттарга көмөлөһөр олус наадалаах проектнай сыантыр арыллан үлэтин саҕалаабытын иһитиннэрэбит.
Үөрүүлээх тэрээһин фойеттан өр сылларга ыччат лидерынан сылдьар чулуу кыыспыт Алена Иудина ыытааччылаах кэлбит ыалдьыттары « сылытар » оонньуулардаах, Ньурба куоратын эдэр оҕолорун толоруутугар вальс үҥкүүлээх уонна «Баай тиит» Ньурба оройуонун эдэр ыччатын түмсүүтүн толоруутугар флешмобтаах бүгүҥҥү баал саҕаланна.
Эҕэрдэ тылы эттилэр « Ньурба оройуона » МО баһылыга А.М.Иннокентьев, “Ньурба куорат” МТ баһылыга Г.В.Игнатьев, Ньурба оройуонун ыччат дьыалатын уонна имидж политикатын салайааччыта В.Г.Владимирова.
Үрдүк сыанаттан «СӨ ыччат политикатын туйгуна» анал ааты ылла П.Д. Федоров, Ньурбатааҕы государственнай көһө сылдьар драматическай театр артыыһа, «СӨ гражданскай инициативатын туйгуна» ааты ылла Ньурба оройуонун ыччат дьыалатын уонна имидж политикатын салайааччыта В.Г. Владимирова, «СӨ култууратын туйгуна» үрдүк ааты ылла Д.И.Бурнашева. Маны таһынан оройуон үрдүнэн үчүгэй көрдөрүүлээх ыччакка бочуотунай грамоталар туттарылыннылар. Баалга кэлбит ыалдьыттары оройуоммут чаҕылхай талааннаах ырыаһыттара, үҥкүүһүттэрэ эҕэрдэлээтилэр.
Бүгүҥҥү баал сүрүн сыала общественнай үлэҕэ көхтөөх кыттыыны ылар, креативнай көрүүлээх, куруутун инники кирбиигэ сылдьар, оройуон сайдарыгар туруулаһан үлэлиир дьоҥҥо сыл түмүгүнэн үрдүк ааттары анал хамыыһыйа быһаарбытын туттарааһын буолла.
«Сыл бастыҥ сүбэһитэ» анала ааты Н.И.Харитонов- Николай Чуор аатынан “Кыталык” КД дириэктэригэр С.Б.Дондоковаҕа туттарда Ньурба оройуонун депуттарын Сүбэтин бэрэссэдээтэлэ Н.М.Михайлова, «Сыл бастыҥ арыйыыта» анал аат иҥэриллиннэ Данилова П.Н. уонна Михайлова Т.Н. “Мастера вкуса” кондитерскай сыах салайааччыларыгар, анал ааты туттарда Урбаан, атыы уонна олохтоох оҥорон таһаарыы департаменын салайааччыта М.М.Пан., «Сыл бастыҥ доброволеһа» анала ааты Антоновка орто оскуолатын үөрэнээччитигэр Столяров Д.М. туттарда анал байыаннай дьайыыга баҕа өттүнэн тирэх пууҥҥа үлэлээн кэлбит, Ыччат управлениетын түөрт сыл устата салайбыт А.М.Неустроев, «Сыл бастыҥ дьиэ кэргэнэ» анал ааты Үөдэй нэһилиэгиттэн сылдьар Марфа уонна Василий Федоровтарга туттарда “Ньурба оройуона” МО баһылыгын солбуйааччыта Н.С.Петрова, «Ньурба эрэлэ» анал аат иҥэрилиннэ С.П.Филипповка, Малдьаҕар орто оскуолатын уон биирис кылаас үөрэнээччитигэр, ааты туттарда Ньурбатааҕы үөрэх управлениетын салайааччыта Ф.Ф.Ушканов, «Сыл бастыҥ общественнига» анал аат барда М.С.Ивановаҕа, Октябрьскай нэһилиэк “Ромашка” оҕо уһуйаанын иитээччитигэр, анал ааты туттарда Ньурбатааҕы тыа хаһаайыстыбатын департаменын салайааччыта Л.В.Ушканов, «Сыл бастыҥ общественнай тэрилтэтэ» анал аат иҥэрилиннэ Дьокуускай куоракка баар Ньурба эдэр ыччатын “Баай Тиит” түмсүүтэ, анал ааты үрдүк сыанаттан туттарда Ньурба оройуонун Култуура департаменын салайааччыта Р.М.Тихонова, «Сыл бастыҥ ыччат политикатын исписийэлииһэ» анал аат ананна Р.Д.Степановаҕа, Марха нэһилиэгин ыччаты кытта үлэлиир исписийэлиискэ, анал ааты туттарда Ньурба оройуонун ыччат дьыалатын уонна имидж политикатын салайааччыта В.Г.Владимирова уонна бу тэрээһин саамай бастыҥын «ҮРДЭЛ» ааты “Ньурба оройуона” МО баһылыгын илиититтэн тутта оҕону эбии сайыннарар «Авокадо» киин салайааччыта М.А.Александрова.
Ыччат баалын кыттыылаахтара салҕыы оҕолуу мэниктии уоттаах –күөстээх дискотекаҕа хаалан, “Хартыына” фото-видео студия фотограба хаартыскаҕа чаҕылхай түгэннэри түһэрэн, эдэр саас кэрэ кэмнэрин өйдүү-саныы сылдьар курдук үйэтиттилэр. Ньурба оройуонун ыччат дьыалатын уонна имидж политикатын саҥа көрүүлээх, ирдэбиллээх, эдэр эрчимнээх Валерия Владимирова салайааччылаах бүгүҥҥү ыччат баала үрдүк таһымҥа ааспытынан, биһиги дириэктэрбит Самангади Базарсадаевна анаабыт курдук Арассыыйаҕа « Уһуйааччы уонна сүбэһит » сылыгар түбэһиннэрэн, бүгүн ыччат баалыгар “Сыл бастыҥ сүбэһитэ” анал ааты ылбытынан коллективпыт аатыттан итиитик- истиҥник эҕэрдэлиибит!
