Бүгүн, олунньу ыйын 22 күнүгэр, Ньурбабыт оройуонугар улахан суолталаах күн үүннэ. Ол курдук “Кыталык” КД сарсыарда 10 чаастан Марха улууһа (Ньурба оройуона) тэриллибитэ 200 сылын бэлиэтиир үөрүүлээх тэрээһин буолла. Тэрээһин киирэр аантан сахалыы сиэринэн, түптэ унаарар буруолаах сахалыы мааны сонноон Далбар Хотуттар арчыларынан, киирээти кытта инники эрэллэрбит Ст.Васильев аатынан элбэх хайысхалаах гимназия уоланнара көрсөннөр бырааһынньыктааҕы тэрээһин фойеттан саҕаланна. Хас да күн инниттэн мунньахтаан, араас идеялары көрөн, наардаан, Бордоҥ нэһилиэгин «Айар киин» норуот айар киинин салайааччыта Иван Семенович Харитонов, Н.И.Харитонов – Николай Чуор аатынан «Кыталык» култуура исписийэлииһэ, СӨ култууратын туйгуна Варвара Георгиевна Плотникова, Ньурба оройуонун култуураҕа департаменын Норуот айымньытын салаатын сэбиэдиссэйэ СӨ култууратын туйгуна Розалия Васильевна Тартакынова режиссердардаах, Н.И.Харитонов-Николай Чуор аатынан «Кыталык» КД уус – уран салайааччыта Айаана Антонова, режиссера Наталья Степанова үс блок сценарийын суруйааччылаах, СӨ үтүөлээх үлэһитэ, Ньурбатааҕы «Норуоттар доҕордоһуулара» музей научнай – чинчийэр салаа сэбиэдиссэйэ Борис Борисович Борисов сүбэһиттээх, Н.И.Харитонов-Николай Чуор аатынан «Кыталык» КД балетмейстера Анжелика Григорьевна Седалищева, Ньурбатаҕы оҕо искусствотын хореографтара туруоруута үҥкүүлээх, фойенан, көрөөччү саалатынан үс түһүмэхтэн турар оройуоммут 200 сылын көрсөр үөрүүлээх тэрээһини арыйдыбыт.
Фойеҕа арыллыы кэннэ официальнай чаас көрөөччү саалатыгар буолла. Быйыл 2024 сыл Дойду үрдүнэн дьиэ кэргэн, Саха Өрөспүүбүлүкэтигэр Оҕо саас, Ньурба оройуонугар туруктаах олох – дьаһах сыллар биллэриллибиттэрэ сценарий быһыытынан таарыллан ааста. Эҕэрдэ тыллары эттилэр СӨ Правительствотын бэрэссэдээтэлин солбуйааччыта Степанов Георгий Михайлович, СӨ Ил Түмэн депутата Прокопьев Владимир Михайлович, “Ньурба оройуона” МО баһылыга Иннокентьев Алексей Михайлович, Ньурба оройуонун депутаттарын Сэбиэтин бэрэссэдээтэлэ Михайлова Нюргуяна Михайловна. Ааспыт сыл түмүгүнэн үрдүк көрдөрүүлээх уонна үлэлэригэр ситиһиилээх Ньурба оройуонун чулуу үлэһиттэригэр наҕараадалар уонна элбэх оҕолооох дьиэ кэргэттэргэ дьиэ ылыналларыгар, эбэтэр тутталларыгар аннаан сертификаттары туттардылар. Үөрүүлээх тэрээһини хордаан ыллаан Ст.Васильев аатынан элбэх хайысхалаах гимназия оҕолоро (сал. С.В.Васильева, А.И.Шестакова), флешмоб үҥкүүлээн Ньурбатааҕы оҕо искусствотын үҥкүү кылааһын оҕолоро (сал. Попова М.А., Андреева Н.Ю., Саввинова Н.И., Софронеева А.И.) үҥкүүлээн киэргэттилэр.
Тэрээһин үһүс блогар аны үс сылынан биһиги Ньурбабытыгар Саха сирин IX норуоттар спортивнай оонньуулара ыытыллаары турарын бэлиэтээн,оройуоммут инники кэскэллээх спорсменнара ааттара ааттанна, фойены тобус-толору маҥан таҥастаах аэробика уустук үҥкүүтүн толорон «Сир симэхтэрин» оҕолоро ылан кэбистилэр. Бу үөрүүлээх түгэҥҥэ эҕэрдэ истиҥ тыллары эттэ, спортка тардыһар ыччат кумира, СӨ депутата Георгий Русланович Балакшин.
Бу бүгүҥҥү күн аны хас эмэ сылынан, уостан түспэт номох буолан Марха улууһун (Ньурба оройуонун) 200 сыллаах үөрүүлээх күнүн аһыллыыта историяҕа хатанардыы хаартыскаҕа, видеоҕа уһуллан үйэтитилиннэ.
