Кулун тутар  19 күнүгэр Хаҥалас улууһун “Өлүөнэ очуостара” национальнай пааркаҕа XIII  Азия оҕолоро оонньуулар уоттара умайан, эстафетаны бүгүн, кулун тутар  26 күнүгэр  Сахабыт сирин 36  муниципальнай оройуоннары кэрийэн, бу сайын бэс ыйын 26 күнүгэр Туймаада хочотугар оонньуулар саҕаланалларын туоһута буолан умайыахтаах уот, биһиги оройуоммутугар тохтоон, Үөһээ Бүлүү улууһуттан ыаллыы сытар Сунтаарга ааһар церемонията буолла.

  Октябрьскай нэһилиэк пааркатыттан быстах дистанциялары тутуһан, факелы Ньурба оройуонун чулуу спортсменнара, тэрилтэ салайааччылара эстафетнай палочкалыы  бэрсэн,  Ленин аатынан болуоссакка тутаах тэрээһин  буолла. Бу үөрүүлээх быһыыга-майгыга эҕэрдэ тыллары эттилэр “Ньурба оройуона” МО баһылыгын солбуйааччы В.Н. Семенов, «Ньурба куорат» МТ баһылыга Г.В.Игнатьев.

    Тэрээһини Ньурба куорат оскуолаларын, общественнай хамсааһыннар кыттыылаахтара, Анжелика Седалищева салайааччылаах “Сир симэхтэрэ” образцовай үҥкүү ансаамбылын оҕолоро, “Кыталык” КД ырыаһыттарын,   формированиеларын кыттыылаахтара киэргэттилэр.

   Эстафета СӨ култууратын туйгуна, Ньурбатааҕы государственнай көһө сылдьар драматическай театр артыыһын оройуоммут кэскиллээх оһуокай тылын таһаарааччыта Прокопий Федоров эҕэрдэ оһуокайынан, хаартыскаҕа түһэн үйэтитиинэн түмүктэннэ.

    Факелы арыаллыыр делегация салҕыы эбиэт кэннэ Сунтаар улууһугар айанныа.