Олунньу 28 күнүгэр “Кыталык” култуура дыбарыаһыгар «Я ваш-конферансье! Дети» диэн оскуола үөрэнээччилэрин икки ардыларыгар I оройуоннааҕы ыытааччылар күрэхтэрэ үрдүк таһымҥа ыытылынна.
Быйылгыттан бу бырайыак оскуола оҕолоругар ыытыллар буолла, ол иннинэ 4 сыл тухары эр дьон ыккардыгар буолан кэлбитэ. Бырайыак ааптара СР Өрөспүүбүлүкэтин култууратын туйгуна, “Кыталык” култуура дыбарыаһын айар холбоһуктарын салайааччыта Римма Ивановна Сидорова саҥа ааттары таһаарар быланнаах бу күрэҕи уоланнарга ыытар санааланна.
Балаһыанньа быһыытынан бу күрэххэ уолаттар эрэ кыттыыны ылаллар. Ньурба орйуонун оскуолаларыттан 4 уолан бэртэрэ күөн көрсүстүлэр. Ол курдук Маалыкайтан Дамир Кононов, Маалыкай орто оскуолатын 10 кылааһын үөрэнээччитэ, Ньурбачаантан Уйгун Угапьев,Ньурбачаан орто оскуолатын 8 кылааһын үөрэнээччитэ, Ньурбаттан Максим Тихонов Убайаан орто оскуолатын 9 кылааһын үөрэнээччитэ уонна ыраах Хорулаттан Эдуард Прибылых Хорула орто оскуолатын 11 кылааһын үөрэнээччитэ күрэхтэстилэр.
Дьүүллүүр сүбэҕэ үлэлээтилэр: Егор Михайлов FM 101,9 долгуҥҥа саҥарар «Ньурба» радио кылаабынай редактора, солбуллубат ыытааччыта, 2022 сыллаахха Аллараа Бэстээххэ ыытыллыбыт «Я-ваш конферансье!» ыытааччылар аһаҕас күрэхтэрин Кылаан кыайыылааҕа, 2022 сыл түмүгүнэн оройуоҥҥа «Сыл бастыҥ ыытааччыта» анал аат хаһаайына, дьүүллүүр сүбэ бэрэссэдээтэлэ, Тумусова Альбина Степановна, СӨ култууратын туйгуна, Н.И.Харитонов-Николай Чуор аатынан «Кыталык» КД режиссера, Сергей Викторович Петров – Уһунча Уола, хоһоонньут, «Ньурба уоттара» айар түмсүү чилиэнэ, «АйАрт» республиканскай эдэр суруйааччылар Союзтарын чилиэнэ, 2029 сыллаахха маҥнайгы тэриллибит «Я-ваш конфернасье!» күрэх «Иэйии» номинация кыайыылааҕа, 2022 сыллаахха ыытыллыбыт эдэр суруйааччылар республикатааҕы 23-с Сүбэ мунньахтарын кыттыылааҕа.
Уолаттар күрэххэ ох курдук оҥостон кэлбиттэр, түөрт түһүмэҕи холкутук ааһан дьүүллүүр сүбэ быһаарыыта маннык буолла:
“Вдохновение” анал аат- Эдуард Прибылых, “Приз зрительских симпатий” Дамир Кононов, “Ведущих конкурсно-игровых программ”- Максим Тихонов, “Ведущий академической манеры ведения”- Уйгун Угапьев уонна Муҥутуур кыайыылааҕынан буолла – Хорулаттан дьэ диҥнээхтик киһи эрэ истэ олоруох курдук «бархатнай» куоластаах – Эдуард Прибылых.
Түгэнинэн туһанан уолаттары өйөөбүт спонсордарга барҕа махталбытын тиэрдэбит сүрүн бирииһи туруорбут Н.И.Харитонов-Николай Чуор аатынан «Кыталык” КД (сал.С.Б.Дондокова), Ньурба улууҺун ыччат политикатын управлениета (сал. Владимирова В.Г.), Ньурба улууҺун спорт управлениета (сал. Васильев Л.Н), Ньурба — Молл атыы эргиэн киинэ (Николаева В.Н.), «Достояние Якутии» ювелирнай маҕаһыын.
Кыттаачылар бары кыттыы иһин туоһу сурук, күрэххэ бэлэмнээбит уһуйааччылар махтал сурук тутан, үөрэнэ-көтөн тарҕастылар. Инникитин бу күрэх үүнэн-сайдан улуустар икки ардыларыгар, онтон салҕыы республиканскай буоларыгар баҕарбыт.
